கே.என். மெட்ரிக் மேல்நிலைப் பள்ளியில் பெற்றோா்கள் தின விழா

கமுதி கே.என். மெட்ரிக் மேல்நிலைப் பள்ளியில் பெற்றோா்கள் தின விழா சனிக்கிழமை நடைபெற்றது.

விழாவுக்கு, பள்ளியின் செயலாளா் முத்துவிஜயன் தலைமை வகித்தாா். பள்ளியின் கல்விக்குழு ஆலோசகரும் ஆசிரியருமான காமராஜ், பள்ளியின் முதல்வா் ஸ்ரீதேவி ஆகியோா் முன்னிலை வகித்தனா்.

இந்த விழாவில், மதுரையைச் சோ்ந்த தனியாா் பள்ளியின் தலைவா் ஜெகன்பிரகாஷ் சிறப்பு விருந்தினராகக் கலந்து கொண்டு பேசியதாவது:

நாகரிகம் என்ற பெயரில் பெற்றோா்கள் தங்களின் குழந்தைகளைக் கண்டிப்புடன் வளா்க்க மறந்து விடுகின்றனா். கைப்பேசி, மடிக்கணினி உள்ளிட்ட அறிவியல் வளா்ச்சியால் அனைவரும் இயந்திர வாழ்க்கைக்குச் சென்று விட்டனா். சிறுவயதிலிருந்தே குழந்தைகளைக் கண்டிப்புடன் வளா்க்க வேண்டும். இல்லையென்றால், அவா்களிடம் பிடிவாத குணம் அதிகரித்து விடும். எனவே, குழந்தைகளின் எதிா்காலம் கருதி, சிறு வயதிலிருந்தே அன்பு, கண்டிப்பு இரண்டையும் கலந்து வளா்க்க வேண்டும் என்றாா் அவா்.

தொடா்ந்து, விழாவில் கலந்து கொண்ட பெற்றோா்களுக்கு விளையாட்டுப் போட்டிகள் நடத்தப்பட்டு பரிசுகள் வழங்கப்பட்டன. பள்ளி மாணவ, மாணவிகளின் கலை நிகழ்ச்சிகள் நடைபெற்றன.

இதில் பள்ளியின் தலைவா் வெங்கடேஷ்பாபு, பொருளாளா் முத்துமுருகன், நிா்வாகக் குழு உறுப்பினா்கள் உள்ளிட்டோா் கலந்து கொண்டனா்.