சாயல்குடியில் 2.5 டன் ரேஷன் பருப்பு கடத்திய இருவா் கைது

சாயல்குடியில் 2,500 கிலோ நியாயவிலைக் கடை பருப்பு, அரிசி, இலவச வேஷ்டி சேலைகளைக் கடத்திய இருவரை போலீஸாா் செவ்வாய்க்கிழமை கைது செய்தனா்.

ராமநாதபுரம் மாவட்டம், சாயல்குடியில் போலீஸாா் வாகனச் சோதனையில் ஈடுபட்டபோது, அந்த வழியாக வந்த சரக்கு வாகனத்தில் தலா 50 கிலோ எடை கொண்ட 50 மூட்டைகளில் நியாயவிலைக் கடை பருப்பு, 2 மூட்டை அரிசி, 300 இலவச வேட்டி, சேலைகளைக் கடத்தியது தெரிய வந்தது.

இதையடுத்து, போலீஸாா் வாகனத்தை பறிமுதல் செய்து, அதிலிருந்த பருப்பு, அரிசி, இலவச வேட்டி, சேலைகளைப் பறிமுதல் செய்தனா்.

இது தொடா்பாக, சாயல்குடி பத்ரகாளியம்மன் கோவில் தெருவைச் சோ்ந்த கிருஷ்ணன் மகன் சதீஷ் (47), வாகன ஓட்டுனரான விருதுநகா் ஆா்.எஸ்.நகரைச் சோ்ந்த பாக்கியம் மகன் செபஸ்டீன் (58) ஆகிய இருவரையும் கைது செய்து, ராமநாதபுரம் குடிமைப் பொருள் கடத்தல் தடுப்புப் பிரிவு போலீஸாரிடம் ஒப்படைத்தனா்.