வங்கக் கடலில் சூறைக் காற்று: மீன்பிடிக்கச் செல்ல தடை

வங்கக் கடலில் நிலவி வரும் சூறைக் காற்று காரணமாக, ராமநாதபுரம் மாவட்ட மீனவா்கள் மறு உத்தரவு வரும் வரை மீன்பிடிக்க கடலுக்குள் செல்லக் கூடாது என மீன்வளத் துறையினா் திங்கள்கிழமை தடை விதித்தனா்.

வங்கக் கடல், மன்னாா் வளைகுடா பகுதிகளில் மணிக்கு 45 முதல் 55 கி.மீ. வேகத்திலும் சூறைக் காற்று வீசக்கூடும். அதிகபட்சமாக 65 கி.மீ வேகம் வரையிலும் வீசக்கூடும் என்றும், கடல் அலை 3 மீட்டா் வரையிலும் எழக் கூடும் என்பதால், மன்னாா் வளைகுடா பகுதி மீனவா்கள் மீன்பிடிக்க கடலுக்குள் செல்ல வேண்டாம் என வானிலை ஆய்வு மையம் அறிவித்தது.

மறுஅறிவிப்பு வரும் வரை நாட்டுப் படகு, விசைப் படகு மீனவா்கள் யாரும் கடலுக்குள் செல்ல வேண்டாம் எனவும், தங்களது மீன்பிடி படகுகள், மீன்பிடி உபகரணங்கள் அனைத்தையும் பாதுகாப்பாக வைத்திடவும் மீன்வளத் துறையினா் அறிவுறுத்தியுள்ளனா்.

மேலும், ராமநாதபுரம் மாவட்டத்தில் தனுஷ்கோடி, பாம்பன், மண்டபம் உள்ளிட்ட மீன்பிடி துறைமுகங்களிலிருந்து செவ்வாய்க்கிழமை (ஆக. 25) கடலுக்குச் செல்ல அனுமதி டோக்கன் வழங்கப்படமாட்டாது என மீன்வளத் துறையினா் தெரிவித்தனா்.