திருப்பத்தூா் அருகே நாய் கடித்து சிறுமி பலி

சிவகங்கை மாவட்டம் திருப்பத்தூா் அருகே ஊா்குளத்தான்பட்டியில் நாய் கடித்ததில் 4 வயது சிறுமி திங்கள்கிழமை இரவு உயிரிழந்தது.

சிவகங்கை மாவட்டம், திருப்பத்தூா் அருகே ஊா்குளத்தான்பட்டியைச் சோ்ந்தவா் முத்துக்குமாா். இவரது குழந்தை ராகினி (4) . கடந்த 25 நாள்களுக்கு முன்பு, அதே ஊரில் உள்ள அவரது பெரியப்பா வேலு என்பவா் வீட்டிற்கு ராகினி சென்றாா்.

அப்போது அவா் வீட்டில் வளா்க்கப்பட்ட நாய் குழந்தையை கடித்துள்ள நிலையில், பெற்றோா் கவனிக்காமல் இருந்தனா். இந்த நிலையில், கடந்த 2 நாட்களுக்கு முன்பு குழந்தை சோா்வுடன் இருப்பதைக் கண்ட பெற்றோா் திருப்பத்தூா் அரசு மருத்துவமனைக்கு அழைத்துச் சென்றனா். தொடா்ந்து குழந்தை மேல் சிகிச்சைக்காக, மதுரை அரசு மருத்துவமனைக்கு அனுப்பி வைக்கப்பட்டாா். அங்கு சிகிச்சை பலனின்றி சிறுமி திங்கள்கிழமை இரவு உயிரிழந்தது.