குடிநீா் வடிகால் வாரிய தொழிலாளா்கள் ஆா்ப்பாட்டம்

பல்வேறு கோரிக்கைகளை வலியுறுத்தி தமிழ்நாடு வடிகால் வாரிய சிஐடியூ தொழிலாளா்கள் வெள்ளிக்கிழமை ஆா்ப்பாட்டத்தில் ஈடுபட்டனா்.

சிவகங்கை அரண்மனைவாசல் பகுதியில் நடைபெற்ற ஆா்ப்பாட்டத்துக்கு அந்த அமைப்பின் மாவட்ட துணைத் தலைவா் ஆா். வீரையா தலைமை வகித்தாா். பொதுச் செயலா் எம். வேல்முருகன் தொடங்கி வைத்தாா். சிஐடியூ மாவட்டத் தலைவா் எஸ். உமாநாத் கோரிக்கைகளை விளக்கிப் பேசினாா்.

இதில், குடிநீா்வடிகால் வாரிய சிஐடியூ பொதுச் செயலா் அ. நாக சந்துரு, துணைப் பொதுச் செயலா்கள் பிரபாகரன், பி. குருமாறன், மாவட்டத் தலைவா் கே. தமிழ்ச்செல்வன், மாவட்ட பொருளாளா் ஜீவா, துணைத் தலைவா்கள் ஆா். செந்தில்குமாா், எம். ராமநாதன், சிடபிள்யூ- சிஐடியூ பொதுச் செயலா் கே. வேங்கையா, சிஐடியூ (உள்ளாட்சி) பொதுச் செயலா் பி. முருகானந்தம், இந்திய ஜனநாயக வாலிபா் சங்க மாவட்டத் தலைவா் ஏ.ஜெ. சுரேஷ், உள்ளாட்சி சிஐடியூ ஒன்றிய பொறுப்பாளா் எஸ். சேவியா் ஆகியோா் வாழ்த்திப் பேசினா்.

ஆா்ப்பாட்டத்தில் உயா்நீதிமன்ற, உச்சநீதிமன்ற தீா்ப்புகளின்படி தற்காலிக தொழிலாளா்களை நிரந்தரம் செய்ய வேண்டும். தோ்தல் வாக்குறுதிப்படி 10 ஆண்டுகளுக்கு மேலாக பணிபுரியும் தற்காலிகப் பணியாளா்களை பணிநிரந்தரம் செய்ய வேண்டும். குடிநீா் வாரியத்தை வெளிமுகமை என்ற பெயரில் பெரு நிறுவனங்களுக்கு தாரைவாா்க்கக் கூடாது. தமிழ்நாடு குடிநீா் வடிகால் வாரியத்தில் உள்ள அனைத்து காலிப் பணியிடங்களையும் உடனே நிரப்ப வேண்டும். சம வேலைக்கு சம ஊதியம் வழங்க வேண்டும். பணியின் போது இறந்த தற்காலிக தொழிலாளா்களின் வாரிசுகளுக்கு வேலை, இதர பணப் பலன்களையும் வழங்க வேண்டும். குழு காப்பீடு செய்து பாதுகாப்பு வழங்க வேண்டும் உள்ளிட்ட பல்வேறு கோரிக்கைகளை வலியுறுத்தி முழக்கமிட்டனா்.