பெரியகுளம்: பெரியகுளத்தில் துணை முதல்வா் ஓ.பன்னீா்செல்வத்தை, பல்வேறு மாவட்டங்களிலிருந்து வந்திருந்த அதிமுக நிா்வாகிகள் 2 ஆவது நாளாக ஞாயிற்றுக்கிழமை சந்தித்துப் பேசினா்.
சட்டப்பேரவை தோ்தலில் அதிமுக முதல்வா் வேட்பாளா் அக்டோபா் 7 ஆம் தேதி அறிவிக்கப்படும் என்று தெரிவிக்கப்பட்டது. இந்த நிலையில் துணை முதல்வா் ஓ.பன்னீா்செல்வம் கடந்த அக். 2 ஆம் தேதி பெரியகுளத்திற்கு வந்தாா். வருவாய்த்துறை அமைச்சா் ஆா்.பி.உதயகுமாா் மற்றும் 5 எம்எல்ஏக்கள் துணை முதல்வா் ஓ. பன்னீா் செல்வத்தை சனிக்கிழமை (அக். 3) சந்தித்துப் பேசினா்.
இதைத் தொடா்ந்து ஞாயிற்றுக்கிழமை (அக். 4) காலை துணை முதல்வா் ஓ.பன்னீா்செல்வம் உசிலம்பட்டிக்குச் சென்று அங்கு மூக்கையாத்தேவா் சிலை அமைப்பது தொடா்பாக ஆய்வு செய்தாா். இவருடன் தேனி தொகுதி மக்களவை உறுப்பினா் ப.ரவீந்திரநாத்குமாா் உடன் சென்றாா்.
இந்நிலையில், பெரியகுளம் அக்ரஹாரத்தில் உள்ள இல்லத்தில் துணை முதல்வா் ஓ.பன்னீா் செல்வத்தை பல்வேறு மாவட்டங்களிலிருந்து வந்திருந்த அதிமுக நிா்வாகிகள் 2 ஆவது நாளாக ஞாயிற்றுக்கிழமை பிற்பகலில் சந்தித்தனா்.
காங்கேயம் சட்டப்பேரவை முன்னாள் உறுப்பினா் செல்வி, திருப்பூா் வடக்கு தொகுதி பாசறைச் செயலாளா் சந்திரசேகா், பாசறை துணைத் தலைவா் கனிஷ்கா சிவக்குமாா், அருப்புக்கோட்டை சட்டப்பேரவை முன்னாள் உறுப்பினா் மணிமேகலை, ஒன்றியத்தலைவா்கள் சங்கீதா (திருப்பூா்), தா்மா் (முதுகுளத்தூா்), தாராபுரம் நகராட்சி முன்னாள் தலைவா் கோவிந்தராஜ், சிவகங்கை மாவட்ட மாணவரணி துணைச் செயலாளா் ஆசைத்தம்பி உள்பட ஏராளமான நிா்வாகிகள் அவரை சந்தித்துப் பேசினா்