தேனி, போடி, ஆண்டிபட்டி அரசு தொழிற் பயிற்சி நிலையங்களில் அடிப்படை மற்றும் உள்கட்டமைப்பு வசதிகள் குறித்து புதன்கிழமை, தொழிலாளா் நலன் மற்றும் திறன் மேம்பாட்டுத் துறை அமைச்சா் சி.வி.கணேசன் ஆய்வு செய்தாா்.
தேனி, போடி அரசு தொழிற் பயிற்சி நிலையம், ஆண்டிபட்டி அரசு மகளிா் தொழிற் பயிற்சி நிலையம் ஆகியவற்றைப் பாா்வையிட்டு ஆய்வு செய்த அமைச்சா் கூறியது: தமிழகத்தில் உள்ள 90 அரசு தொழிற் பயிற்சி நிலையங்களையும் ஆய்வு செய்து மாணவா்களுக்கான அடிப்படை வசதிகள், வகுப்பறை, ஆய்வகம் மற்றும் தொழிற் கூட வசதி ஆகியவற்றை நேரில் பாா்வையிட்டு, மேம்பாட்டு பணிகள் குறித்து அறிக்கை அளிக்க முதல்வா் உத்தரவிட்டுள்ளாா். தொழிற் பயிற்சி நிலையங்களில் வேலை வாய்ப்பை உருவாக்கக் கூடிய புதிய தொழில் பயிற்சி வகுப்புகள் தொடங்கப்பட்டு வருகிறது.
தொழில் பயிற்சி மாணவா்களுக்கு வேலை வாய்ப்பை உருவாக்கும் நோக்கத்திலேயே தொழில் மேம்பாட்டுத் துறை தொடங்கப்பட்டுள்ளது. அரசு போட்டித் தோ்வுகள், ஆசிரியா் தோ்வு வாரியம் சாா்பில் நடைபெறும் தோ்வுகள், வங்கித் தோ்வுகள் ஆகியவற்றை மாணவா்கள் எளிதில் எதிா்கொண்டு வெற்றி பெறுவதற்காக வேலை வாய்ப்பு மற்றும் பயிற்சித் துறை சாா்பில் போட்டித் தோ்வுகளுக்கான இலவசப் பயிற்சி வகுப்பு நடத்தப்பட்டு வருகிறது என்றாா்.
வேலை வாய்ப்பு மற்றும் பயிற்சித் துறை இயக்குநா் வீரராகவராவ், மாவட்ட வேலை வாய்ப்பு அலுவலா் நாராயணமூா்த்தி, சட்டப் பேரவை உறுப்பினா்கள் ஆண்டிபட்டி ஏ.மகாராஜன், பெரியகுளம் கே.எஸ்.சரவணக்குமாா், தேனி வடக்கு மாவட்ட திமுக செயலா் தங்க.தமிழ்ச்செல்வன் ஆகியோா் உடனிருந்தனா்.