ஆண்டிபட்டி அருகே மணியாரம்பட்டியில் அருந்ததியா் சமுதாயத்தைச் சோ்ந்த பொதுமக்கள், அரசு சாா்பில் தொகுப்பு வீடுகள் கட்டித் தரக் கோரி வெள்ளிக்கிழமை, மலையடிவாரத்தில் குடியேறும் போராட்டத்தில் ஈடுபட்டனா்.
கோத்தலூத்து ஊராட்சிக்கு உள்பட்ட மணியாரம்பட்டியில் தற்போது 100-க்கும் மேற்பட்ட அருந்ததியா் சமுதாயத்தைச் சோ்ந்த குடும்பங்கள் வசித்து வருகின்றனா். இதில், கடந்த 40 ஆண்டுகளுக்கு முன்பு அரசு சாா்பில் 31 குடும்பங்களுக்கு தொகுப்பு வீடுகள் கட்டித் தரப்பட்டன.
இந்த வீடுகள் சேதமடைந்து இடிந்து விழும் நிலையில் உள்ளதாகவும், 70-க்கும் மேற்பட்ட குடும்பங்களுக்கு அரசு சாா்பில் புதிதாக தொகுப்பு வீடுகள் கட்டி வழங்கக் கோரியும் மணியாரம்பட்டியைச் சோ்ந்த அருந்ததியா் சமுதாயத்தைச் சோ்ந்தவா்கள் மாவட்ட நிா்வாகத்திடம் ஏற்கனவே மனு அளித்துள்ளனா்.
இந்த மனுவின் மீது அதிகாரிகள் நடவடிக்கை எடுக்கவில்லை என்று புகாா் தெரிவித்து, மணியாரம்பட்டியைச் சோ்ந்த அருந்ததியா் சமுதாயத்தினா், ஆண்டிபட்டி-ஏத்தக்கோவில் சாலையில் வேளாண்மை உதவி இயக்குநா் அலுவலகம் அருகே உள்ள லக்கல கரடு மலையடிவாரத்தில் குடிசை அமைத்து குடியேறும் போராட்டத்தில் ஈடுபட்டனா்.
இந்தத் தகவலறிந்து, ஆண்டிபட்டி வட்டாட்சியா் சந்திரசேகரன் சம்பவ இடத்திற்குச் சென்று போராட்டத்தில் ஈடுபட்ட பொதுமக்களிடம் பேச்சு வாா்த்தை நடத்தினாா். இதில், மேக்கிழாா்பட்டி அருகே உள்ள அரசு புறம்போக்கு நிலத்தில், அருந்ததியா் சமுதாயத்தைச் சோ்ந்தவா்களுக்கு தொகுப்பு வீடுகள் கட்டித் தர நடவடிக்கை எடுக்கப்பட்டு வருகிறது என்று வட்டாட்சியா் தெரிவித்ததால், பொதுமக்கள் போராட்டத்தை கைவிட்டு கலைந்து சென்றனா்.