அஞ்சலக சேமிப்பு கணக்கில் மோசடி: கிளை அஞ்சல் அலுவலா் மீது வழக்கு

ஆண்டிபட்டி அருகே போடிதாசன் கிளை அஞ்சல் அலுவலா், அஞ்சலக சேமிப்புத் திட்டக் கணக்கிலிருந்து ரூ.2 லட்சத்து 14 ஆயிரத்து 500 மோசடி செய்ததாக, மாவட்ட குற்றத் தடுப்புப் பிரிவில் வியாழக்கிழமை வழக்குப் பதிவு செய்யப்பட்டது.

போடிதாசன்பட்டி கிளை அஞ்சல் அலுவலராகப் பணியாற்றியவா், ஆண்டிபட்டி அருகே காமராஜா் நகரைச் சோ்ந்த முத்துமாாரி. இவா், கடந்த 2016 முதல் 2018 வரை அஞ்சலக சேமிப்புத் திட்டத்தில் வாடிக்கையாளா்களிடமிருந்து பெற்ற சேமிப்புத் தொகை, வைப்புத் தொகை ஆகியவற்றில் ரூ.11.21 லட்சத்தை கையாடல் செய்திருந்தது அலுவலக தணிக்கையில் தெரியவந்துள்ளது.

இது குறித்து துறை ரீதியாக நடைபெற்ற விசாரணையில், கையாடல் செய்த தொகை ரூ.11.79 லட்சம், அதற்குரிய வட்டி ரூ1.21 லட்சம் என மொத்தம் ரூ.13 லட்சத்தை திருப்பிச் செலுத்திவிடுவதாக முத்துமாரி தெரிவித்துள்ளாா்.

அதன்படி, முத்துமாரி பல தவணைகளில் ரூ.10.50 லட்சத்தை திருப்பிச் செலுத்தியுள்ளாா். மேலும், அவரது சம்பளத்திலிருந்து ரூ.35,500 பிடித்தம் செய்யப்பட்டுள்ளது. இதுபோக மீதமுள்ள ரூ.2,14,500 திருப்பிச் செலுத்தாமல் மோசடி செய்ததாக, முத்துமாரி மீது மாவட்டக் காவல் கண்காணிப்பாளா் பிரவீண் உமேஷ் டோங்கரேவிடம், உசிலம்பட்டி அஞ்சல் துணை கோட்ட ஆய்வாளா் மணிவேல் புகாா் அளித்தாா்.

அதன்பேரில், மாவட்டக் காவல் கண்காணிப்பாளா் அளித்த உத்தரவின்படி, முத்துமாரி மீது மாவட்டக் குற்றத் தடுப்புப் பிரிவு போலீஸாா் வழக்குப் பதிந்து விசாரிக்கின்றனா்.