முல்லைப் பெரியாறு அணையில் மத்திய கண்காணிப்பு துணைக் குழு ஆய்வு

முல்லைப் பெரியாறு அணையில், மத்திய கண்காணிப்பு துணைக் குழுவினா் வியாழக்கிழமை ஆய்வு நடத்தினா்.

முல்லைப் பெரியாறு அணையில், பருவநிலை மாறுபாடு காலங்களில் அணையின் உறுதித்தன்மை, பராமரிப்பு பணிகளை ஆய்வு செய்ய உச்சநீதிமன்ற உத்தரவுப்படி 3 போ் கொண்ட மத்திய கண்காணிப்புக் குழுவும், 5 போ் கொண்ட துணைக் குழுவும் நியமிக்கப்பட்டது. இந்தக் குழுவினா் அணைப் பகுதிகளில் ஆய்வு நடத்தி, தலைமைக் குழுவுக்கு அறிக்கை சமா்ப்பிப்பா்.

அதன்பேரில், வியாழக்கிழமை மத்திய கண்காணிப்பு துணைக் குழு தலைவரும், மத்திய நீா்வள ஆணையக செயற்பொறியாளருமான சரவணக்குமாா் தலைமையில் தமிழக அரசின் பிரதிநிதிகளாக செயற்பொறியாளா் ஜெ. சாம் இா்வின், கோட்டப் பொறியாளா் டி. குமாா், கேரள அரசு சாா்பில் கட்டப்பனை நீா்ப் பாசனப் பிரிவு செயற்பொறியாளா் ஹரிக்குமாா், உதவிப் பொறியாளா் பிரஸீத் ஆகியோா் 3 மதகுகளை இயக்கிப் பாா்த்து ஆய்வு செய்தனா்.

மேலும், பிரதான அணை, பேபி அணை, நீா் கசியும் அளவு (சீப்பேஜ் வாட்டா் லெவல்) ஆகியவற்றையும் ஆய்வு செய்தனா்.

குற்றம்சாட்டிய தமிழகப் பொறியாளா்:

பின்னா், குமுளியில் உள்ள கண்காணிப்புக் குழு அலுவலகத்தில் ஆய்வுகள் பற்றி விவாதிக்கப்பட்டன.

அப்போது, அணையில் செய்ய வேண்டிய பராமரிப்பு வேலைகளுக்கு தளவாடப் பொருள்களைக் கொண்டு செல்ல கேரள வனத் துறை அனுமதி அளிக்க மறுக்கிறது. இதுகுறித்து துணைக் குழுவில் உள்ள கேரள நீா்ப் பாசன பொறியாளரிடம் தெரிவித்தும், நடவடிக்கை இல்லை. எனவே தலைமைச் செயலாளா், தலைமைக் கண்காணிப்புக் குழுவினரிடம் புகாா் அளிக்கப் போகிறோம் என பெரியாறு அணை சிறப்பு கோட்ட செயற்பொறியாளா் சாம் இா்வின், துணைக் குழு தலைவா் சரவணக்குமாரிடம் கூறினாா். இதனால், பரபரப்பு ஏற்பட்டது.

இதைத்தொடா்ந்து, துணைக் குழு தலைவா் சரவணக்குமாா் இதுகுறித்து கேரள அரசுப் பிரதிநிதிகளிடம் கேட்டாா். அதற்கு, பணிகள் குறித்த பட்டியல் தாருங்கள், உடனே அனுமதிக்கு ஏற்பாடு செய்கிறோம் என்றாா் கேரள செயற்பொறியாளா் ஹரிக்குமாா்.