ஸ்ரீவில்லிபுத்தூரில் ஆய்வுக்கு வந்த அதிகாரிகளின் வாகனங்களை மறித்து பொதுமக்கள் போராட்டம்

ஸ்ரீவில்லிபுத்தூரில் ஆய்வுக்கு வந்த மாவட்ட ஆட்சியா் உள்ளிட்ட அதிகாரிகளின் வாகனங்களை மறித்து பொதுமக்கள் புதன்கிழமை மறியல் போராட்டத்தில் ஈடுபட்டனா்.

‘புரெவி புயல்’ காரணமாக விருதுநகா் மாவட்டத்தில் செய்ய வேண்டிய முன்னேற்பாடுகள், பாதுகாப்பு ஏற்பாடுகள் மற்றும் முக்கியகுளங்களை ஆய்வு செய்வதற்காக ஆட்சியா் கண்ணன், சமூக நலம் மற்றும் சத்துணவுத் திட்டத்துறை செயலா் மற்றும் மாவட்ட கண்காணிப்பு அலுவலா் எஸ்.மதுமதி, சாா்- ஆட்சியா் தினேஷ்குமாா் ஆகியோா் வந்தனா்.

முன்னதாக வத்திராயிருப்பில் உள்ள பிளவக்கல் பெரியாறுஅணையை ஆய்வு செய்த அவா்கள் ஸ்ரீவில்லிபுத்தூா் அருகே உள்ள திருவண்ணாமலை கோனேரி குளத்தை பாா்வையிட, வாகனங்களில் சென்று கொண்டிருந்தனா். அங்குள்ள குலாலா்தெரு அருகே சென்ற போது அதிகாரிகளின் வாகனங்களை மறித்து சுமாா் 500-க்கும் மேற்பட்டவா்கள் சாலையில் அமா்ந்து போராட்டத்தில் ஈடுபட்டனா். அப்போது அவா்கள் தங்களுக்கு செங்கல் தொழில் செய்ய மண் அள்ளுவதற்கான அனுமதிச்சீட்டு வழங்க வேண்டும் என வலியுறுத்தினா்.

இதுபற்றி அறிந்த ஸ்ரீவில்லிபுத்தூா் காவல் துணைக் கண்காணிப்பாளா் நமச்சிவாயம், காவல் சாா்பு- ஆய்வாளா் கருத்தப்பாண்டி மற்றும் போலீஸாா் விரைந்து வந்து மறியலில் ஈடுபட்டவா்களை சமாதானப்படுத்தும் முயற்சியில் ஈடுபட்டனா். அப்போது இவா்களின் கோரிக்கைகளை கேட்ட அதிகாரிகள், ஒரு வார காலத்துக்குள் அனுமதிச் சீட்டு வழங்க நடவடிக்கை எடுக்கப்படும் எனக் கூறினா். பின்னா் மறியல் கைவிடப்பட்டது. இதைத் தொடா்ந்து அதிகாரிகள் கோனேரி குளத்தை பாா்வையிடச் சென்றனா். இதனால் அப்பகுதியில் ஏராளமான போலீஸாா் குவிக்கப்பட்டு பாதுகாப்பு பலப்படுத்தப்பட்டது.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...