விருதுநகா் ஆட்சியா் அலுவலகத்தில் நாளைமக்கள் குறைதீா் கூட்டம்பொது மக்கள் நேரடியாக மனு அளிக்கலாம்

விருதுநகா்: விருதுநகா் மாவட்ட ஆட்சியா் அலுவலக கூட்டரங்கில் திங்கள்கிழமை நடைபெறும் குறைதீா் கூட்டத்தில் பொதுமக்கள் நேரடியாக மனு அளிக்கலாம் என ஆட்சியா் ரா. கண்ணன் தெரிவித்துள்ளாா்.

இதுகுறித்து சனிக்கிழமை அவா் வெளியிட்டுள்ள செய்திக்குறிப்பு: விருதுநகா் மாவட்ட ஆட்சியா் அலுவலகத்தில் திங்கள்கிழமை தோறும் நடைபெற்று வந்த மக்கள் குறைதீா்க்கும் நாள் கூட்டம் கரோனா தடுப்பு நடவடிக்கை காரணமாக தற்காலிகமாக நிறுத்தி வைக்கப்பட்டி ருந்தது. இந்நிலையில், தமிழக முதல்வா் எடப்பாடி கே.பழனிசாமி உத்தரவின் பேரில், திங்கள்கிழமை (பிப். 1) காலை 10 மணிக்கு விருதுநகா் மாவட்ட ஆட்சியா் அலுவலகத்தில் உள்ள வளா்ச்சி மன்றக் கூட்டரங்கில் குறைதீா் கூட்டம் நடைபெற உள்ளது. அப்போது, பொதுமக்கள் சமூக இடைவெளியை கடைப்பிடிப்பதுடன், முகக்கவசம் அணிந்து இக்கூட்டத்தில் கலந்து கொள்ளலாம். மேலும் இக்குறை தீா்க்கும் நாள் கூட்டத்துக்கு வரும் விண்ணப்பதாரா்கள் தவறாது தங்களது ஆதாா் எண் மற்றும் செல்லிடப்பேசி எண்ணைக் குறிப்பிட்டு மனுக்களை வழங்க வேண்டும் என அதில் தெரிவித்துள்ளாா்.