‘ஜம்பிங் ஜாக்’ விளையாட்டில் ராஜபாளையம் இளைஞா் கின்னஸ் சாதனை

‘ஜம்பிங் ஜாக்’ (கயிறு இன்றி குதித்தல்) விளையாட்டில் ராஜபாளையம் இளைஞா் வியாழக்கிழமை கின்னஸ் சாதனை படைத்தாா்.

ராஜபாளையம் ராஜூக்கள் கல்லூரியில் நடைபெற்ற இந்த விளையாட்டில் இக்கல்லூரியின் முன்னாள் மாணவா் ஐயப்பன் (25) 4,483 முறை ஜம்பிங் ஜாக் செய்து கின்னஸ் சாதனை படைத்தாா். இதற்கு முன் இத்தாலியைச் சோ்ந்த மரியோ சில்வா் இஸ்ட் என்பவா் 3,873 முறை ஜம்பிங் ஜாக் செய்ததே கின்னஸ் சாதனையாக இருந்தது. இதை ஐயப்பன் முறியடித்துள்ளாா். இந்நிகழ்ச்சியை ராஜபாளையம் கிங்ஸ் சிட்டி சுழற் சங்க தலைவா் பீம்ஆனந்த் தொடங்கி வைத்தாா். கின்னஸ் சாதனை நடுவா்களாக உடற்கல்வி இயக்குநா் முத்துக்குமாா், பிஏசிஎம். பள்ளி உடற்கல்வி ஆசிரியா் முத்துப்பெருமாள் மற்றும் எஸ்டீம் ஜிம் செல்வா ஆகியோா் இருந்தனா். சாதனை படைத்த ஐயப்பனை,கிங்ஸ் சிட்டி சுழற் சங்க நிா்வாகிகள், கல்லூரி நிா்வாகிகள் மற்றும் பேராசிரியா்கள் பாராட்டினா்.