வத்திராயிருப்பில் கொப்பரை தேங்காய் கொள்முதல் நிலையம் அமைக்க வேண்டும் என விவசாயிகள் வலியுறுத்தியுள்ளனா்.
விருதுநகா் மாவட்ட ஆட்சியா் அலுவலக கூட்டரங்கில் ஆட்சியா் ஜெ. மேகநாதரெட்டி தலைமையில் விவசாயிகள் குறைதீா் கூட்டம் வெள்ளிக்கிழமை நடைபெற்றது.
இதில் விவசாயிகள் பேசியதாவது: மாவட்டத்தில் விவசாய கடன் அட்டை பெற சிறப் பு முகாம் நடத்த வேண்டும். வத்திராயிருப்பு அருகே ராமசாமியாபுரத்தில் அரசு சாா்பில் நெல் கொள்முதல் நிலையம் அமைக்கப்பட்டதால், விவசாயிகள் நேரடியாக நெல்லை விற்பனை செய்து பயனடைந்தனா். தற்போது அப்பகுதியில் அறுவடை செய்யும் நிலையில் நெற் பயிா்கள் உள்ளன. எனவே, இங்குள்ள அரசு நெல் கொள்முதல் நிலையத்தை மேலும் 15 நாள்களுக்கு நீட்டிக்க வேண்டும். எம். ரெட்டியபட்டி பகுதியில் உள்ள 10 கிராமங்களில் கடந்த 2020-2021 ஆம் ஆண்டிற்கான பயிா் காப்பீட்டுத் தொகை வழங்கப்பட வில்லை. ஆமத்தூா், சாத்தூா் பகுதிகளிலும் இதே நிலைதான். பயிா் காப்பீடு கிடைக்குமா அல்லது கிடைக்காதா, அதற்கான காரணத்தை தெரிவிக்க வேண்டும். விவசாயிகளை வேளாண் துறை அலுவலகம், காப்பீட்டு அலுவலகத்திற்கு அலைக்கழிப்பு செய்யக் கூடாது. அதேபோல், வாரிசுதாரா்களுக்கு பட்டா வழங்க பகுதி வாரியாக சிறப்பு முகாம் நடத்த வேண்டும். ஏ. முக்குளம் பகுதி யில் திருட்டு அதிகரித்துள்ளது. திருடியவா்கள் மற்றும் அவா்களது வாகனங்களை அ. முக்குளம் காவல் நிலையத்தில் ஒப்படைத்தும் எவ்வித நடவடிக்கையும் எடுக்க மறுக்கின்றனா்.
அதே போல், வேளாண்துறை அலுவலா்கள் கிராமப் பகுதிகளுக்கு வரும் போது, ஒரு சிலரை மட்டும் சந்தித்து விட்டு செல்கின்றனா். விவசாயிகள் அனைவரையும் அழைத்து பயிா்கள் குறித்து கருத்து கேட்க வேண்டும். பயிரில் உள்ள பூச்சி தாக்குதல் குறித்து விவசாய நிலங்களை நேரடியாக பாா்வையிட்டு ஆலோசனை வழங்க வேண்டும். காரியாபட்டி அருகே அரசகுளம் கண்மாய் உள்பட பல கண்மாய்களின் வரத்து கால்வாய்களை மழை காலத்திற்கு முன்பு சீரமைக்க வேண்டும்.
நாலுரில் நெல் உள்களம் சேதமடைந்திருப்பதை சரி செய்ய வேண்டும். நரிக்குடி பகுதியில் காட்டுப் பன்றிகள் பயிா்களை சேதப்படுத்தி வருகின்றன. அவற்றைக் கட்டுப்படுத்த வனத்துறை நடவடிக்கை எடுக்க வேண்டும். அரசு சாா்பில் கொப்பரை தேங்காய் கொள்முதல் நிலையம் சாத்தூா் பகுதியில் அமைக்கப்படும் என கடந்த ஆட்சியில் தெரிவிக்கப்பட்டது. அங்கு தென்னை மரங்களே இல்லாத நிலையில், அப்பகுதியில் கொப்பரை தேங்காய் கொள்முதல் நிலையம் அமைப்பதால் எந்த பயனும் இல்லை. எனவே, தென்னை மரங்கள் அதிகம் உள்ள வத்திராயிருப்பு பகுதியில் கொப்பரை தேங்காய் கொள்முதல் நிலையம் அமைக்க வேண்டும் என பலமுறை விவசாயிகள் குறைதீா் கூட்டத்தில் வலியுறுத்தி வருகிறோம். அதற்கு என்ன நடவடிக்கை எடுக்கப்பட்டுள்ளது.
தற்போது வத்திராயிருப்பு பகுதியில் கொப்பரை தேங்காயை ரூ. 7 என்ற மிகக் குறைந்த விலையில் கொள்முதல் செய்கின்றனா். இதனால் விவசாயிகள் கடும் நஷ்டத்தை சந்தித்து வருகின்றனா். சாத்தூா் அருகே நென்மேனி பகுதியில் இடிந்த பாலத்தை சீரமைக்க வேண்டும். அதேபோல் சாத்தூா் உழவா் சந்தைக்கு விவசாயிகள் விவசாயப் பொருள்களை கொண்டு வரும் வகையில் விழிப்புணா்வு ஏற்படுத்த வேண்டும். மேலும் 18 பட்டி கிராமப் பகுதிகளிலிருந்து வரும் அனைத்துப் பேருந்துகளும் உழவா் சந்தை வழியாக வர நடவடிக்கை எடுக்க வேண்டும். மடை பழுது காரணமாக பாவாலி கண்மாயில் மழைநீா் தேங்காமல் வெளியேறுகிறது. எனவே, மடைகளை சீரமைக்க வேண்டும். வடபட்டியில் மானியத்தில் கிணறு தோண்ட மனு அளித்து 3 ஆண்டுகள் கடந்து விட்டன. ஆனால் வரிசைப்படி இல்லாமல் பலருக்கு தாமதமாக கிணறு தோண்ட வேளாண் பொறியியல் துறையினா் அனுமதி வழங்கி உள்ளனா் என்றனா்.
இதற்கு பதிலளித்து மாவட்ட ஆட்சியா் ஜெ. மேகநாத ரெட்டி கூறியதாவது: ராமசாமியாபுரம் நெல் கொள்முதல் நிலையத்தில் விவசாயிகள் நெல்லை விற்க காலஅவகாசம் வழங்கப்படும். பயிா் காப்பீடு கிடைக்காதவா்கள் ஜூலை 25 ஆம் தேதி வேளா ண் அலுவலகத்துக்குச் சென்று உரிய காரணத்தை தெரிந்து கொள்ளலாம். ஏ. முக்குளம் திருட்டு தொடா்பாக மாவட்ட காவல் கண்காணிப்பாளரிடம் பேசி நடவடிக்கை எடுக்கப்படும். நூறு நாள் வேலைத் திட்டத்தை நிறுத்த எனக்கு அதிகாரமில்லை. விவசாயிகளின் கோரிக்கை குறித்த தகவலை அரசுக்கு பரிந்துரைப்பேன். நென்மேனி அருகே இடிந்த பாலத்தை சீரமைக்க பொதுப்பணித்துறை அதிகாரிகள் நடவடிக்கை எடுக்க வேண்டும் என்றாா்.
முன்னதாக விவாதத்தின்போது நூறு நாள் வேலை திட்டத்தை முழுமையாக ரத்து செய்ய வேண்டும் என நாலூா் பகுதி விவசாயி ஒருவா் தெரிவித்தாா். அதற்கு சில விவசாயிகள் எதிா்ப்பு தெரிவித்து வாக்குவாத்தில் ஈடுபட்டனா். இதையடுத்து அவா்களை, மாவட்ட ஆட்சியா் சமாதானப்படுத்தி பிரச்னையை முடிவுக்கு கொண்டு வந்தாா்.
இதில் மாவட்ட ஆட்சியரின் நோ்முக உதவியாளா் (விவசாயம்) சங்கா் எஸ். நாராயணன், வேளாண் இணை இயக்குனா் உத்தண்டராமன் மற்றும் பல்வேறு துறை அரசு அலுவலா்கள், விவசாயிகள் கலந்து கொண்டனா்.