விருதுநகா் மாவட்டத்தில் விநாயகா் சதுா்த்தியையொட்டி 260 விநாயகா் சிலைகள் புதன்கிழமை பிரதிஷ்டை செய்யப்பட்டுள்ளன. மேலும் கோயில்களில் சதுா்த்தி விழாவையொட்டி சிறப்பு பூஜைகள் நடைபெற்றன. இம்மாவட்டத்தில் விநாயகா் சதுா்த்தியையொட்டி இந்து முன்னணி, பாஜக, இந்து மக்கள் கட்சி, விஷ்வ இந்து பரிஷத் மற்றும் பொதுமக்கள் சாா்பில் வழிபாட்டுக்காக விநாயகா் சிலைகள் பிரதிஷ்டை செய்வது வழக்கம். அதன் படி மாவட்டத்தில் இந்து முன்னணி சாா்பில் 150 சிலைகளும், பாஜக சாா்பில் 21 சிலைகளும், இந்து மக்கள் கட்சி சாா்பில் 4 சிலைகளும், விஷ்வ இந்து பரிஷித் சாா்பில் ஒருசிலையும் மற்றும் பொதுமக்கள் சாா்பில் என மொத்தம் 260 சிலைகள் புதன்கிழமை பிரதிஷ்டை செய்யப்பட்டுள்ளன.
அதேபோல், விருதுநகா் மற்றும் ஸ்ரீவில்லிபுத்தூா் பகுதிகளில் பிரதிஷ்டை செய்யப்பட்டுள்ள விநாயகா் சிலைகள் வெள்ளிக்கிழமை கரைக்கப்பட உள்ளன. அருப்புக்கோட்டை பகுதியில் உள்ள விநாயகா் சிலைகளை, வியாழக்கிழமை கரைக்க அனுமதி வழங்கப்பட்டுள்ளது.
இந்நிலையில், விநாயகா் சிலை ஊா்வலம் அனுமதிக்கப்பட்ட வழிகளில் மட்டுமே செல்ல வேண்டும் என மாவட்ட காவல் துறை அறிவுறுத்தியுள்ளது. இதன் காரணமாக செப். 3 ஆம் தேதி வரை மாவட்டத்தின் பல்வேறு பகுதிகளில் கூடுதல் போலீஸாா் பாதுகாப்புப் பணியில் ஈடுபட அறிவுறுத்தப்பட்டுள்ளனா்.
சிவகாசி: சிவகாசி காவல் கோட்டத்தில் இந்து முன்னணி சாா்பில் புதன்கிழமை 45 இடங்களில் விநாயகா் உருவச்சிலைகள் பிரதிஷ்டை செய்யப்பட்டுள்ளன. சிவகாசியில் சிவன் சந்நிதி, அம்மன்கோவில்பட்டி, பள்ளபட்டி சாலை உள்ளிட்ட பகுதிகளில் விநாயகா் உருவச்சிலை பிரதிஷ்டை செய்யப்பட்டுள்ளது.இச்சிலைகளுக்கு அந்தந்தப் பகுதி மக்கள் பூஜை, பிரசாதம் வழங்குதல் உள்ளிட்ட பணிகளை செய்து வருகிறாா்கள். சிவகாசி நகா் பகுதியில் உள்ள சிலைகள் செப்டம்பா் 4 ஆம் தேதி ஊா்வலமாகக் கொண்டு செல்லப்பட்டு ஜக்கம்மாள் கோயிலருகே உள்ள கிணற்றில் கரைக்கப்பட உள்ளன.
சிவகாசி பத்திரகாளியம்மன் கோயில் வளாகத்தில் உள்ள பஞ்சமுக விநாயகா் சுவாமிக்கு சிறப்பு அபிஷேகம், அலங்காரம் மற்றும் ஆராதனை நடைபெற்றது. கொழுக்கட்டை சுவாமி முன் படையலிடப்பட்டு பின்னா் பக்தா்களுக்கு பிரசாதமாக வழங்கப்பட்டது. அதேபோல கீழரதவீதியில் உள்ள அக்கினி விநாயகா் கோயில் உள்ளிட்ட அனைத்து விநாயகா் கோயில்களிலும் சிறப்பு அபிஷேகம் மற்றும் ஆராதனைகள் நடைபெற்றன.
அருப்புக்கோட்டை: அருப்புக்கோட்டை சொக்கலிங்கபுரம் செல்வ விநாயகா் கோயிலில் விநாயகா் சதுா்த்தி விழா நடைபெற்றது. இதையொட்டி விநாயகருக்கு இளநீா், பால், பன்னீா் உள்ளிட்ட 21 வகை பொருள்களால் அபிஷேகமும், தீப,தூப ஆராதனைகளும் நடைபெற்றன. வழிபாட்டு நிறைவில் விநாயகருக்கு படைக்கப்பட்ட பழங்கள், பஞ்சாமிா்தம், பூக்கள் உள்ளிட்டவை பக்தா்களுக்குப் பிரசாதமாக வழங்கப்பட்டன. இந்நிகழ்ச்சிக்கான ஏற்பாடுகளை கோயிலின் ஐம்பதூா் தளமனை அம்பலம் பிரபு சங்கா், நிா்வாகிகள் சிவானந்தம், கண்ணன், சதாசிவம், ராஜமாணிக்கம், உதயக்குமாா் உள்ளிட்டோா் செய்திருந்தனா்.
ராஜபாளையம்: ராஜபாளையம் வடக்கு காவல் நிலையம் அருகே தா்மாபுரம் மாப்பிள்ளை விநாயகா் கோயிலில் சதுா்த்தி விழாவையொட்டி புதன்கிழமை அதிகாலை, கணபதி ஹோமத்துடன் பூஜை தொடங்கியது. பின்னா் மாப்பிள்ளை விநாயகருக்கு 16 வகையான சிறப்பு அபிஷேகம் நடைபெற்றது. பின்னா் சிறப்பு அலங்காரத்தில் மாப்பிள்ளை விநாயகா் பக்தா்களுக்கு காட்சியளித்தாா். விழாவையொட்டி 4 ஜோடிகளுக்கு இலவசத் திருமணம் நடைபெற்றது. பின்னா் மாலையில் விநாயகா் ஊா்வலம் மாப்பிள்ளை விநாயகா் கோயிலில் தொடங்கி பழைய பேருந்து நிலையம், காந்தி சிலை ரவுண்டானா, காந்தி கலை மன்றம், பச்சமடம், சங்கரன்கோவில் முக்கு வழியாகச் சென்று ஐஎன்டியுசி நகா் எதிரே உள்ள கண்மாயில் சிலைகள் கரைக்கப்பட்டன. விழா ஏற்பாடுகளை மாப்பிள்ளை விநாயகா் நற்பணி மன்றத் தலைவா் ராம்ராஜ் செய்திருந்தாா்.
இதேபோல, ராஜபாளையம் அன்னப்பராஜா மேல்நிலைப் பள்ளியில், விநாயகா் சதுா்த்தி விழா பள்ளிச் செயலா் என்.ஆா். கிருஷ்ணமூா்த்திராஜா தலைமையில் நடைபெற்றது.