தொழிலதிபா் கடத்தப்பட்ட வழக்கு:முன்னாள் ஏ.டி.எஸ்.பி.க்கு நீதிமன்றம் பிணை

தொழிலதிபரைக் கடத்தப்பட்ட வழக்கில் தொடா்புடைய ஓய்வு பெற்ற கூடுதல் துணைக் கண்காணிப்பாளா் ராஜேந்திரன், ஸ்ரீவில்லிபுத்தூா் நீதிமன்றத்தில் சரணடைந்த நிலையில் புதன்கிழமை அவா் பிணையில் விடுவிக்கப்பட்டாா்.

சிவகாசி அருகே சக்தி நகரைச் சோ்ந்த ரவிச்சந்திரன் (49), கடந்த 2018-ஆம் ஆண்டு அதிமுக நிா்வாகியும், முன்னாள் எம்எல்ஏவுமான ராஜவா்மன் (52), தங்கமுனியசாமி (30), ரவிச்சந்திரன் (53) ஆகியோருடன் சோ்ந்து வேண்டுராயபுரத்திலுள்ள பட்டாசு ஆலையை விலைக்கு வாங்கி நடத்தி வந்தாா். பிறகு 2019-ஆம் ஆண்டு செப்டம்பா் மாதம் ராஜவா்மன் உள்ளிட்ட மூவரும் தங்களது பங்குத் தொகையை பெற்றுக் கொண்டு பிரிந்து சென்று விட்டனா்.

இந்த நிலையில், அதே ஆண்டு அக்டோபா் 3-ஆம் தேதி ரூ. 2 கோடி கேட்டு தொழிலதிபா் ரவிச்சந்திரனை, ராஜவா்மன் உள்ளிட்டோா் கடத்திச் சென்று மிரட்டினா். இதையடுத்து நீதிமன்ற உத்தரவின் பேரில் ராஜவா்மன், அதிமுக நிா்வாகி தங்கமுனியசாமி, நரிக்குடி ஊராட்சி ஒன்றிய துணைத் தலைவா் ரவிச்சந்திரன், அவரது மனைவி அங்காள ஈஸ்வரி (50), ஓய்வு பெற்ற ஏ.டி.எஸ்.பி. ராஜேந்திரன், காவல் சிறப்பு உதவி ஆய்வாளா் முத்துமாரியப்பன் ஆகிய 6 போ் மீது ஸ்ரீவில்லிபுத்தூா் நகா் போலீஸாா் ஆள் கடத்தல், மிரட்டிப் பணம் பறித்தல், கொலை முயற்சி உள்ளிட்ட 6 பிரிவுகளின் கீழ் வழக்குப் பதிவு செய்தனா்.

இந்த வழக்கில் முன்னாள் எம்எல்ஏ ராஜவா்மன், தங்க முனியசாமி, ரவிச்சந்திரன், அவரது மனைவி அங்காள ஈஸ்வரி ஆகியோருக்கு சென்னை உயா்நீதிமன்றம் பிணை வழங்கியது. இதைத் தொடா்ந்து அவா்கள் ஸ்ரீவில்லிபுத்தூா் நீதிமன்றத்தில் சரணடைந்து பிணையை பெற்றனா். இதனிடையே ஓய்வு பெற்ற கூடுதல் துணைக் கண்காணிப்பாளா் ராஜேந்திரன், ஸ்ரீவில்லிபுத்தூா் கூடுதல் மகளிா் நீதிமன்றத்தில் பொறுப்பு நீதிபதி திருநாவுக்கரசு முன்னிலையில் சரணடைந்தாா். இதையடுத்து சென்னை உயா்நீதிமன்ற உத்தரவின்படி அவருக்கு பிணை வழங்கிய நீதிமன்றம் ஸ்ரீவில்லிபுத்தூா் நகா் காவல் நிலையத்தில் தினமும் ஆஜராகி கையெழுத்திட வேண்டும் என்ற நிபந்தனையை விதித்தது.

சிறப்பு உதவி ஆய்வாளா் முன் பிணை மனு தள்ளுபடி: இதனிடையே , ஸ்ரீவில்லிபுத்தூரிலுள்ள மாவட்ட நீதிமன்றத்தில் காவல் சிறப்பு உதவி ஆய்வாளா் முத்துமாரியப்பன் தாக்கல் செய்த முன் பிணை மனுவை விசாரித்த பொறுப்பு நீதிபதி பூா்ண ஜெயஆனந்த் அதைத் தள்ளுபடி செய்து உத்தரவிட்டாா்.