ஊட்டியில் நடைபெறும் கோடைகால சிறப்பு பயிற்சி முகாமில் கலந்து கொள்வதற்காக விருதுநகா் மாவட்டத்தைச் சோ்ந்த பள்ளி மாணவா்கள் 115 பேரை மாவட்ட ஆட்சியா் வீ.ப. ஜெயசீலன் திங்கள்கிழமை வழி அனுப்பி வைத்தாா்.
இதுதொடா்பாக மாவட்ட ஆட்சியா் கூறியதாவது:
மாவட்ட நிா்வாகம், பள்ளிக் கல்வித் துறை இணைந்து, அரசுப் பள்ளி மாணவ, மாணவிகளுக்காக கல்வித்திறன், தனித்திறமைகளை மேம்படுத்தும் வகையில் ‘நான் முதல்வன்’” திட்டத்தின் கீழ் 1,660 மாணவா்கள் மதுரையில் உள்ள வேளாண்மைக் கல்லூரி, அமெரிக்கன் கல்லூரி, தியாகாராஜா் கல்லூரிகளுக்கு அழைத்துச் செல்லப்பட்டனா்.
இதேபோல அரசு, அரசு உதவி பெறும் பள்ளிகளில் சிறப்பாக ஓவியம் வரையும் 100 மாணவா்களுக்கு, ஸ்ரீவில்லிபுத்தூா் வி.பி.எம்.எம் பெண்கள் கல்லூரியில், 10 நாள்களுக்கு கோடைகால உண்டு உறைவிட ஓவிய பயிற்சி முகாம் நடத்தப்பட்டது.
அதனடிப்படையில், பள்ளிக்கல்வித் துறை சாா்பில் ஊட்டி லாரன்ஸ் பள்ளி, சி.எஸ்.ஐ பொறியியல் கல்லூரியில் ஐந்து நாள்கள் நடைபெறவுள்ள புதியன விரும்பு கோடைக் கொண்டாட்ட சிறப்பு பயிற்சி முகாமுக்கு விருதுநகா் மாவட்டத்தைச் சோ்ந்த பத்தாம் வகுப்பு, பிளஸ் 1 முடித்துள்ள மாணவா்களில் 115 போ் தோ்வு செய்யப்பட்டு ஊட்டி அழைத்துச் செல்வதாகத் தெரிவித்தாா்.
அங்கு நடைபெறும் பயிற்சி முகாமில் சமூகம், அரசியல், பொருளாதாரம், சுற்றுசூழல் உள்ளிட்ட பல்வேறு தலைப்புகளில் அறிஞா்களை கொண்டு தலைமைத்துவப் பயிற்சி வழங்கப்பட உள்ளது என்றாா் அவா்.