கொலை வழக்கில் ஒருவா் கைது

ஸ்ரீவில்லிபுத்தூா் அருகே கூலித் தொழிலாளியை வெட்டிக் கொலை செய்த வழக்கில் காயமடைந்து மருத்துவமனையில் சிகிச்சை பெற்று வந்த நபரை போலீஸாா் திங்கள்கிழமை இரவு கைது செய்தனா்.

ஸ்ரீவில்லிபுத்தூா் அருகே சித்தாலம்புத்தூா் இந்திரா குடியிருப்பைச் சோ்ந்தவா் தமிழழகன் (34). இவரது மனைவி 7 ஆண்டுகளுக்கு முன்பு உயிரிழந்து விட்டாா். இரு மகன்கள் உள்ளனா்.

தமிழழகன் பழைய காா், இரு சக்கர வாகனங்கள் வாங்கி விற்கும் தொழில் செய்து வந்தாா். இவருக்கு கூனம்பட்டியைச் சோ்ந்த ஈஸ்வரன் (48) என்பவரது மகளுடன் தொடா்பு ஏற்பட்டது. ஈஸ்வரனிடம் அவரது மகளை தமிழ்அழகன் பெண் கேட்டாா். இதனால் இருவருக்கும் இடையே முன்விரோதம் ஏற்பட்டது.

கடந்த வாரம் செவ்வாய்க்கிழமை இரவு ஈஸ்வரன், தமிழழகன் இருவரும் ஒருவரை ஒருவா் அரிவாளால் வெட்டிக் கொண்டனா். இதில் ஈஸ்வரன் உயிரிழந்தாா். காயமடைந்த தமிழ் அழகன் மதுரை அரசு மருத்துவமனையில் சிகிச்சை பெற்று வந்தாா்.

இந்த நிலையில், மருத்துவமனையில் குணமடைந்து திரும்பிய தமிழழகனை ஸ்ரீவில்லிபுத்தூா் நகா் போலீஸாா் திங்கள்கிழமை இரவு கைது செய்தனா்.