விதிகளை மீறி நிலக்கரி ஏற்றிச்சென்ற 21 லாரிகளுக்கு அபராதம்

விதிகளை மீறி துறைமுகத்திலிருந்து நிலக்கரி ஏற்றிச் சென்ற 21 லாரி நிா்வாகத்தினருக்கு அபராதம் விதிக்கப்பட்டது.

காரைக்கால் தனியாா் துறைமுகத்திலிருந்து வெளிநாடுகளில் இருந்து இறக்கப்படும் நிலக்கரி, ரயில் மற்றும் லாரிகள் மூலம் தமிழகம் உள்ளிட்ட மாநிலங்களுக்கு கொண்டு செல்லப்படுகிறது.

லாரிகளில் நிலக்கரியை, விதிகளை மீறி ஏற்றிச் செல்வதால், சாலையோரங்களில் நிலக்கரி துகள்கள் அதிகளவு கொட்டுகின்றன. இதனால் இருசக்கர வாகனத்தில் செல்வோா், அதில் சறுக்கி விபத்துக்குள்ளாவது தொடா்கிறது. கடந்த சில நாள்களில் 10-க்கும் மேற்பட்டோா் இதனால் விபத்துக்குள்ளான நிலையில், விபத்துகள் கண்காணிப்புக் கேமராவில் பதிவானதை கருத்தில்கொண்டு, மாவட்ட ஆட்சியா் து. மணிகண்டன், துறைமுக நிா்வாகத்தினா், காவல்துறையினா், போக்குவரத்துத்துறையினரை சனிக்கிழமை அழைத்து ஆலோசனை வழங்கினாா்.

மண்டல காவல் கண்காணிப்பாளா் ஏ.சுப்பிரமணியன் அறிவுறுத்தலின்பேரில், போக்குவரத்துக் காவல் ஆய்வாளா் லெனின்பாரதி, நிலக்கரி ஏற்றிச் சென்ற லாரிகளை சனிக்கிழமை மாலை நிறுத்தி சோதனை செய்தாா். அப்போது 21 லாரிகளில் அளவுக்கு அதிகமாக நிலக்கரி ஏற்றப்பட்டும், முறையாக மூடப்படாமல் கொண்டு செல்லப்படுவதை உறுதி செய்த அவா், லாரி நிா்வாகத்தினருக்கு அபராதம் விதித்து, ஓட்டுநருக்கு எச்சரிக்கை விடுத்தாா். விதிகளை பின்பற்றாவிட்டால் லாரிகள் பறிமுதல் செய்யப்படும் எனவும் எச்சரிக்கப்பட்டது.