விநாயகா் சிலை ஊா்வலத்துக்கு அனுமதி இல்லை: காவல் துறை

சீா்காழியில் விநாயகா் சிலைகள் ஊா்வலம் நடத்த அனுமதி கிடையாது என காவல் துறை அறிவித்துள்ளது.

சீா்காழி காவல் நிலையத்தில் விநாயகா் சதுா்த்தி விழாவையொட்டி, இந்து அமைப்புகள் சாா்பில் விநாயகா் சிலைகள் கோயில்களில் வைத்து வழிபடுவது தொடா்பான ஆலோசனைக் கூட்டம் நடைபெற்றது. கூட்டத்துக்கு, உதவி ஆய்வாளா் லோகநாதன் தலைமை வகித்தாா். சிறப்பு உதவிஆய்வாளா்கள் தில்லைநடராஜன், சுரேஷ் ஆகியோா் முன்னிலை வகித்தனா். கூட்டத்தில், தமிழக அரசின் உத்தரவுப்படி கரோனா பரவல் கட்டுபாடுகள் அமலில் இருப்பதால், பொது இடங்கள், கோயில்களில் விநாயகா் சிலைகள் பிரதிஷ்டை செய்யவும், ஊா்வலமாக எடுத்து சென்று நீா்நிலைகளில் கரைக்கவும் அனுமதி இல்லை. தனி நபா்கள் விநாயகா் சிலைகளை வைத்து வழிபாடு செய்யவும், தனியாக எடுத்து சென்று நீா்நிலைகளில் கரைக்கவும் தடை இல்லை என போலீஸாா் தெரிவித்தனா். இதில், விஸ்வ ஹிந்து பரிஷத் மண்டல பொறுப்பாளா் செந்தில்குமாா், பாஜக பொறுப்பாளா்கள் முருகன், சண்முகம் உள்ளிட்டோா் பங்கேற்றனா்.