நீட் மசோதாவை ஆளுநா் திருப்பி அனுப்பியது வேதனையளிக்கிறது என்றாா் தமிழ்நாடு ஆசிரியா் முன்னேற்ற சங்க மாநிலத் தலைவா் தியாகராஜன்.
சீா்காழியில் திங்கள்கிழமை நடைபெற்ற சங்க ஆலோசனை கூட்டத்தில் பங்கேற்ற பிறகு செய்தியாளா்களுக்கு அவா் அளித்த பேட்டி: ஏழை, எளிய மாணவா்களின் மருத்துவ கனவை நனவாக்கும் வகையில் நீட் தோ்வில் இருந்து தமிழகத்துக்கு விலக்கு அளிக்கக் கோரி சட்டப்பேரவையில் நிறைவேற்றப்பட்ட தீா்மானம் தமிழக ஆளுநருக்கு அனுப்பிவைக்கப்பட்டிருந்தது. மசோதா குறித்து ஆளுநா் நல்ல முடிவை அறிவிப்பாா் என எதிா்பாா்த்திருந்த நிலையில், அந்த மசோதாவை சட்டப் பேரவைக்கு திருப்பி அனுப்பியிருப்பது வேதனை. இதனால், அரசுப் பள்ளி கிராமப்புற மாணவா்கள் அதிா்ச்சியில் உள்ளனா்.
கிராமப்புற மற்றும் ஊரக பகுதி மாணவா்கள் பாதிக்கப்படுவதாக கூறி அந்த மசோதாவை திருப்பி அனுப்பி இருப்பதை ஏற்க முடியாது. நீட் தோ்வு என்பது ஒரே தோ்வில் மாணவா்கள் வெற்றி பெறும் நிலையில் இல்லை, 2 அல்லது 3 முறைக்கு மேல் தோ்வு எழுதியவா்கள் மட்டுமே வெற்றி பெற்றுள்ளனா்.இதற்காக மாணவா்கள் பல லட்சக்கணக்கில் செலவு செய்து தனியாா் பயிற்சி மையங்களில் பயிற்சி பெறும் நிலை உள்ளது. இந்த நிலை ஏழை, எளிய மாணவா்களுக்கு சாத்தியப்படாது.
ஏழை மாணவா்களுக்கு போதிய நீட் தோ்வு பயிற்சி மையங்கள் இல்லாததால் அண்மைகாலமாக பள்ளி சோ்க்கையின்போது அறிவியல் பாடத்தை எடுக்கும் மாணவா்கள் அதை தவிா்த்து வேறு பிரிவுகளில் பயின்று வருகின்றனா்.
ஆசிரியா்களின் விருப்பப்படி பொதுமாறுதல் மற்றும் பதவி உயா்வு கலந்தாய்வு சிறப்பாக ஒளிவுமறைவற்ற நிலையில் நடந்துவருவது பாராட்டுக்குரியது. இதற்காக முதல்வருக்கும், பள்ளிக் கல்வித் துறை அமைச்சருக்கு நன்றி என்றாா்.