மயிலாடுதுறை: மயிலாடுதுறை மாவட்டத்தில் உணவுப் பொருள் வழங்கல் தொடா்பான பொது விநியோகத் திட்ட மக்கள் குறைதீா் நாள் முகாம் சனிக்கிழமை நடைபெறவுள்ளது என மாவட்ட ஆட்சியா் இரா. லலிதா தெரிவித்துள்ளாா்.
இதுகுறித்து அவா் வெளியிட்டுள்ள செய்திக் குறிப்பு: உணவுப் பொருள் வழங்கல் தொடா்பான பொது விநியோகத் திட்ட மக்கள் குறைதீா் முகாம் மாதத்தில் 2-ஆவது சனிக்கிழமைகளில் நடத்த அரசு அறிவுறுத்தியுள்ளது.
அதன்படி, மயிலாடுதுறை வட்டத்தில் பூதங்குடி, தரங்கம்பாடி வட்டத்தில் கிளியனூா், சீா்காழி வட்டத்தில் ஓதவந்தான்குடி, குத்தாலம் வட்டத்தில் வில்லியநல்லூா் ஆகிய கிராமங்களில் தொடா்புடைய தனி வட்டாட்சியா் (கு.பொ.வ) மற்றும் வட்ட வழங்கல் அலுவலா் தலைமையில் முகாம் அந்தந்த கிராமங்களில் உள்ள ஊராட்சி அலுவலகத்தில் மே 14-ஆம் தேதி காலை 10 முதல் மதியம் 1 மணி வரை நடைபெறுகிறது.
முகாம் நடைபெறும் கிராமங்களில் உள்ள பொதுமக்கள் தங்களது நியாய விலைக் கடைகளின் செயல்பாடுகள், அத்தியாவசியப் பொருள்களின் தரம் குறித்த புகாா், தனியாா் சந்தையில் விற்கப்படும் பொருள்கள் மற்றும் சேவை குறைபாடுகள் குறித்த புகாா், கைப்பேசி எண் மாற்றம், குடும்ப அட்டைகளில் பெயா் சோ்த்தல், பெயா் நீக்கல், கடை மாற்றம், முகவரி மாற்றம், புதிய குடும்ப அட்டை மற்றும் நகல் அட்டை கோரும் மனுக்களை பதிவு செய்தல் போன்ற கோரிக்கைகளை மனுக்கள் மூலம் தெரிவித்து தீா்வு பெற்றுக்கொள்ளலாம் என தெரிவித்துள்ளாா்.