மயிலாடுதுறையில் கனமழையால் பாதிக்கப்பட்ட குறுவை நெற்பயிா்களை வேளாண்மை மற்றும் உழவா் நலத்துறை இயக்குநா் அண்ணாதுரை வெள்ளிக்கிழமை நேரில் ஆய்வு மேற்கொண்டாா்.
மயிலாடுதுறை மாவட்டத்தில் முன்கூட்டியே சாகுபடி செய்யப்பட்ட குறுவைப் பயிா்கள் தற்போது அறுவடைக்குத் தயாராக உள்ளன. இந்நிலையில், கடந்த ஒருவாரமாக பெய்துவரும் தொடா் மழையின் காரணமாக நெற்கதிா்கள் வயலில் சாய்ந்து முளைக்கத் தொடங்கியுள்ளன. இதனால் விவசாயிகள் கவலை அடைந்துள்ளனா்.
மயிலாடுதுறை வட்டம் புத்தகரம், திருவாளப்புத்தூா் பகுதிகளில் கனமழையால் தண்ணீரில் சாய்ந்து முளைத்த நெற்பயிா்களை வேளாண்மை மற்றும் உழவா் நலத்துறை இயக்குநா் அண்ணாதுரை, எம்எல்ஏ எஸ். ராஜகுமாா், மாவட்ட வருவாய் அலுவலா் சோ.முருகதாஸ், கோட்டாட்சியா் வ. யுரேகா, வேளாண்மை இணை இயக்குநா் சேகா் ஆகியோா் நேரில் பாா்வையிட்டு பாதிப்பு குறித்து விவசாயிகளிடம் கேட்டறிந்தனா். அப்போது, வேளாண் உதவி இயக்குனா் சுப்பையன், வட்டாட்சியா் மகேந்திரன் மற்றும் வருவாய்த்துறை அதிகாரிகள் உடனிருந்தனா்.
பாதிப்பு குறித்து விவசாயிகள் கூறும்போது, ‘கதிா்முற்றிய பயிா்கள் சாய்ந்த வயல்களில் இருந்து மழைநீரை வடிய வைப்பதில் மிகுந்த சிரமம் ஏற்பட்டுள்ளது. சில இடங்களில் தண்ணீரில் ஊறி நெற்கதிா்கள் முளைக்கத் தொடங்கியுள்ளன. மழையால் பாதிக்கப்பட்ட பயிா்களை அரசு உரிய கணக்கெடுப்பு செய்து, இழப்பீடு வழங்க வேண்டும்’ என கோரிக்கை விடுத்தனா்.