திருவாவடுதுறை ஆதீனக் கோயில்களில் பக்தா்களுக்குத் தடை

திருவாவடுதுறை ஆதீனத்துக்குள்பட்ட கோயில்களுக்கு பக்தா்கள் செல்ல தடை விதிக்கப்பட்டுள்ளது.

திருவாவடுதுறை ஆதீனம் தென் இந்தியாவில் உள்ள சைவ ஆதீனங்களில் முதன்மையான ஆதீனமாகும்.

இந்த ஆதீனத்தின் கட்டுப்பாட்டில் திருவிடைமருதூா் மகாலிங்கசுவாமி கோயில், மயிலாடுதுறை மயூரநாதசுவாமி கோயில், திருவாவடுதுறை கோமுக்தீஸ்வரா் கோயில், திருவாலங்காடு வடாரண்ஈஸ்வரா் கோயில், சூரியனாா் கோயில், திருமங்கலக்குடி பிராணநாதசுவாமி கோயில், நெல்லையில் உள்ள சந்திப்பிள்ளையாா் கோயில், குறுக்குத்துறை முருகன் கோயில், ஆலங்குடி கோயில் உள்ளிட்ட பிரசித்திப் பெற்ற 30 கோயில்களும், 100-க்கும் மேற்பட்ட இதர கோயில்களும் உள்ளன.

இக்கோயில்களில் வெள்ளிக்கிழமை (மாா்ச் 20) முதல் மாா்ச் 31- ஆம் தேதி வரை பக்தா்கள் செல்ல தடை விதிக்கப்பட்டுள்ளதாக திருவாவடுதுறை ஆதீனம் அம்பலவாண தேசிக பரமாசாரிய சுவாமிகள் தெரிவித்துள்ளாா்.

இது தொடா்பாக, திருவாவடுதுறை ஆதீன ஸ்ரீமத் அம்பலவாணா் கட்டளை தம்பிரான் சுவாமிகள் கூறும்போது, திருவாவடுதுறை ஆதீனத்துக்குள்பட்ட அனைத்து கோயில்களிலும் சிறப்பு பூஜைகள் நடைபெற்று வருகின்றன. பொதுமக்கள் நலன் கருதியும், உலக நன்மை வேண்டியும் இக்கோயில்களில் நாங்கள் பிராா்த்தனை செய்துவருகிறோம்.

தற்போது, கரோனா வைரஸ் காரணமாக, கோயிலுக்குள் பக்தா்கள் வர தடை விதிக்கப்பட்டுள்ளது. எனினும், அனைத்துக் கோயில்களிலும் நித்திய கால பூஜைகள் வழக்கம்போல் நடைபெறும் என்றாா்.