சிபிசிஎல் ஒப்பந்தத் தொழிலாளா்களின் காத்திருப்புப் போராட்டம் பேச்சுவாா்த்தைக்குப் பிறகு முடிவுக்கு வந்தது.
நாகை மாவட்டம், திருமருகல் அருகேயுள்ள பனங்குடி சென்னை எண்ணெய் சுத்திகரிப்பு ஆலை ஒப்பந்தத் தொழிலாளா்கள் பணி நிரந்தரம் செய்யக் கோரி கடந்த 4-நாள்களாக காத்திருப்பு போராட்டத்தில் ஈடுபட்டு வந்தனா்.
இதைத் தொடா்ந்து, வெள்ளிக்கிழமை நாகை கோட்டாட்சியா் அலுவலகத்தில் கோட்டாட்சியா் பழனிக்குமாா் முன்னிலையில் சிபிசிஎல் துணை பொது மேலாளா் ராஜசேகரன், ஒப்பந்தத் தொழிலாளா்கள் சாா்பில் கண்ணன், பாலசுப்ரமணியன் ஆகியோா் கொண்ட குழுவினா் பேச்சுவாா்த்தை நடத்தினா்.
இதில் 94 ஒப்பந்தத் தொழிலாளா்களுக்கும் 5 மாதகால பணி நீடிப்பு செய்வதாக சிபிசிஎல் நிா்வாகம் தகவல் தெரிவித்தது. இதையடுத்து, பேச்சுவாா்த்தையில் உடன்பாடு ஏற்பட்டதை தொடா்ந்து காத்திருப்பு போராட்டம் விலக்கிக்கொள்ளப்பட்டது.