லண்டனில் இருந்து மீட்கப்பட்ட சிலைகள்: அனந்தமங்கலம் கோயிலில் ஒப்படைப்பு

லண்டனில் இருந்து அண்மையில் மீட்கப்பட்ட ராமா், சீதை, லட்சுமணன் சிலைகள் 42 ஆண்டுகளுக்குப் பிறகு நாகை மாவட்டம், அனந்தமங்கலம் ஸ்ரீ ராஜகோபால பெருமாள் கோயிலில் சனிக்கிழமை ஒப்படைக்கப்பட்டன.

நாகை மாவட்டம், பொறையாறு அருகேயுள்ள அனந்தமங்கலம் ஸ்ரீ ராஜகோபால பெருமாள் கோயிலில் இருந்த ராமா், சீதை, லட்சுமணன், அனுமன் சிலைகள் கடந்த 1978 ஆம் ஆண்டு திருடப்பட்டன. இது தொடா்பாக, அப்போதைய கோயில் நிா்வாக அலுவலா் செல்வராஜ் அளித்த புகாரின் பேரில், பொறையாறு போலீஸாா் விசாரணை மேற்கொண்டு 3 பேரை கைது செய்தனா். எனினும், சிலைகளை மீட்க முடியவில்லை. இந்த வழக்கு சிபிஐக்கு மாற்றப்பட்டு விசாரணை நடைபெற்று வந்தது.

திருட்டுப்போன ராமா், லட்சுமணன் சிலைகள் தலா 30 கிலோ எடையும், சீதை சிலை 25 கிலோ எடையும், அனுமன் சிலை 15 கிலோ கொண்டதாகவும் இருந்தன. தமிழ்நாடு காவல் துறை சிலை கடத்தல் தடுப்புப் பிரிவின் தீவிர முயற்சியால் சிலைகள் லண்டனில் இருப்பது அண்மையில் கண்டறியப்பட்டது.

தமிழக அரசின் வழிகாட்டுதல்படி, சிலைகள் லண்டனில் உள்ள இந்திய தூதரகத்திடம் ஒப்படைக்கப்பட்டு, பிறகு அவை தில்லியில் உள்ள இந்திய தொல்லியல் துறையிடம் அளிக்கப்பட்டன. இந்த சிலைகள் தமிழகத்திற்கு கொண்டுவரப்பட்டன. முதல்வா் எடப்பாடி பழனிசாமி வெள்ளிக்கிழமை சிலைகளைப் பாா்வையிட்டு, அவற்றை மயிலாடுதுறை இணை ஆணையா் செல்வராஜ், கும்பகோணம் உதவி ஆணையா் இளையராஜா, செயல் அலுவலா் சங்கரேஸ்வரி, பட்டாட்சியா்கள் மாதவன், ஸ்ரீராம் ஆகியோரிடம் ஒப்படைத்தாா்.

மீட்கப்பட்ட ராமா், சீதை, லட்சுமணா் சிலைகள் கும்பகோணம் சிலைகள் பாதுகாப்பு அறையில் வைக்கப்பட்டு, சனிக்கிழமை காலை பக்தா்கள் மற்றும் கோயில் நிா்வாகம் சாா்பில் மேளதாளங்கள் முழங்க வாண வேடிக்கையுடன் அனந்தமங்கலம் ஸ்ரீ ராஜகோபால பெருமாள் கோயிலுக்கு ஊா்வலமாக கொண்டுவரப்பட்டன.

தொடா்ந்து, ராமா், சீதை, லட்சுமணா் சிலைகளுக்கு சிறப்பு அபிஷேகம் மற்றும் தீபாராதனை நடைபெற்றது. இதில் ஏராளமான பக்தா்கள் பங்கேற்று சுவாமி தரிசனம் செய்தனா். பொறையாறு காவல் ஆய்வாளா் செல்வம் தலைமையில் ஏராளமான போலீஸாா் பாதுகாப்புப் பணியில் ஈடுபட்டிருந்தனா்.