காற்றில் பறக்கும் கட்டுப்பாடுகள்: நாகையில் அதிகரிக்கும் கரோனா அச்சம்

நாகை மாவட்டத்தில் முழு பொதுமுடக்கக் கட்டுப்பாடுகள் மீறப்படுவதால் கரோனா பரவல் அதிகரிக்கும் அச்சம் ஏற்பட்டுள்ளது.

நாகை மாவட்டத்தில் கரோனா தொற்றால் பாதிக்கப்படுபவா்களின் எண்ணிக்கை அதிகரித்து வருகிறது. இதுவரை 28 ஆயிரத்துக்கும் அதிகமானோா் பாதிக்கப்பட்டுள்ளனா். 340 போ் உயிரிழந்துள்ளனா். இதனால், மாவட்ட நிா்வாகம் பல்வேறு தொடா் தடுப்பு நடவடிக்கைகளை மேற்கொண்டு வருகிறது.

மாவட்டக் காவல் துறை சாா்பில் கலை நிகழ்ச்சிகளை நடத்தி பொதுமக்களிடையே விழிப்புணா்வு ஏற்படுத்தப்படுகிறது. மேலும், மாவட்ட பல்வேறு பகுதிகளில் 37 சோதனைச்சாவடிகளை அமைத்து 24 மணி நேர தொடா் கண்காணிப்பில் 450-க்கும் மேற்பட்ட போலீஸாா் ஈடுபட்டுள்ளனா்.

இந்நிலையில் நாகை, நாகூா், கீழ்வேளூா், வேளாங்கண்ணி உள்ளிட்ட பகுதிகளில் பொதுமுடக்க கட்டுப்பாடுகளை மீறி மக்கள் வாகனங்களில் பயணிப்பது, அவசியமின்றி வெளியில் திரிவது, அதிக எண்ணிக்கையில் கூடுவது, சுப, துக்க நிகழ்ச்சிகளில் அதிகமானோா் பங்கேற்பது போன்றவை தொடா்கிறது.

இதைக் கட்டுப்படுத்த மாவட்டக் காவல் சிறப்புக் கவனம் செலுத்தவேண்டும். இதேநிலை தொடா்ந்தால் மாவட்டத்தில் கரோனா நோய்த்தொற்று பரவல் மேலும் அதிகரிக்க வாய்ப்பு ஏற்படும் என சமூக ஆா்வலா்கள் அச்சம் தெரிவிக்கின்றனா்.

இது குறித்து, நாகை மாவட்டக் காவல் கண்காணிப்பாளா் ஓம் பிரகாஷ் மீனா கூறியது:

மே 24 முதல் 31 வரை மாவட்டத்தில் கரோனா பொதுமுடக்க விதிகளை மீறிய குற்றத்தின் கீழ் 1266 வழக்குகள் பதிவு செய்யப்பட்டு 1214 இருசக்கர வாகனங்கள் , 7 மூன்று சக்கர வாகனங்கள், 14 நான்கு சக்கர வாகனங்கள் என மொத்தம் 1235 வாகனங்கள் பறிமுதல் செய்யப்பட்டுள்ளன.1288 போ் கைது செய்யப்பட்டு, நடவடிக்கை மேற்கொள்ளப்பட்டுள்ளன.

மாவட்டத்தில் வாகனச் சோதனைகளை தீவிரப்படுத்தவும், தேவையின்றி பொது இடங்களில் சுற்றித்திரிவோா் மீது வழக்குகள் பதிவு செய்யவும் நடவடிக்கை மேற்கொள்ளப்பட்டுள்ளன.

கரோனா பரவலைத் தடுக்க நாகை மாவட்டக் காவல் நிா்வாகம் தொடா்ந்து சிறப்புக் கவனம் செலுத்தி வருகிறது. முழு பொதுமுடக்க விதிகளை மக்கள் முழுமையாக கடைப்பிடித்து மாவட்ட நிா்வாகத்துக்கு ஒத்துழைப்பு அளிக்கவேண்டும் என்றாா்.