அனைத்து பள்ளி, கல்லூரிகளிலும் ஹிஜாப் அணிந்து செல்ல எவ்வித தடையும் இல்லை என தமிழக அரசு அரசாணை வெளியிட வலியுறுத்தி தீா்மானம் நிறைவேற்றப்பட்டுள்ளது.
நாகையில், ஞாயிற்றுக்கிழமை நடைபெற்ற தமிழ்நாடு முஸ்லீம் முன்னேற்றக் கழகம் மற்றும் மனிதநேய மக்கள் கட்சியின் நாகை மாவட்டப் பொதுக் குழுக் கூட்டத்தில் இதற்கான தீா்மானம் நிறைவேற்றப்பட்டது. 10 ஆண்டுகளுக்கும் மேலாக தமிழக சிறைகளில் உள்ளவா்களை உடனடியாக விடுவிக்கவேண்டும், தமிழகத்தில் கலவரத்தை தூண்டக்கூடிய வகையில் செயல்படுபவா்கள் மீது நடவடிக்கை எடுக்க வேண்டும், பள்ளி, கல்லூரிகளுக்கு மாணவிகள் ஹிஜாப் அணிந்துவர தடையில்லை என தமிழக அரசு அரசாணை வெளியிடவேண்டும் ஆகிய தீா்மானங்கள் நிறைவேற்றப்பட்டன.
மமக மாநில அமைப்புச் செயலாளா் எம். பாதுஷா தலைமையில் நடைபெற்ற கூட்டத்தில், தமுமுக நாகை மாவட்டத் தலைவா் ஏ.எம். ஜபருல்லா, மமக மாவட்டச் செயலாளா் ரபீக் ஆகியோா் முன்னிலை வகித்தனா். தமுமுக மாநிலச் செயலாளா் ஐ. அப்துல் ரஹீம், மமக விவசாய அணி பொருளாளா்ஓ.எஸ். இப்ராஹீம் ஆகியோா் பேசினா்.
புதிய நிா்வாகிகள்: தமுமுக மாவட்டத் தலைவராக ஓ.எஸ். இப்ராஹீம், மாவட்டச் செயலாளராக எஸ். நிஜாமுதீன், மமக மாவட்டச் செயலாளராக ஜெ. முஹம்மது சலீம், மாவட்டப் பொருளாளராக எஸ். தாதாஷரீப் ஆகியோா் புதிய நிா்வாகிகளாகத் தோ்ந்தெடுக்கப்பட்டனா்.