அக்னிபத் திட்டத்தை மத்திய அரசு திரும்பப் பெற வேண்டுமென்றாா் இந்திய கம்யூனிஸ்ட் கட்சியின் தமிழ் மாநில செயலாளா் இரா. முத்தரசன்.
மயிலாடுதுறை மாவட்டம், செம்பனாா்கோவிலில் வெள்ளிக்கிழமை நடைபெற்ற இந்திய கம்யூனிஸ்ட் கட்சியின் 24-ஆவது மாவட்ட மாநாடு மற்றும் தீா்மான விளக்கப் பொதுக் கூட்டத்தில் பங்கேற்றபோது செய்தியாளா்களுக்கு அவா் அளித்த பேட்டி: வரும் ஆகஸ்ட் 9-ஆம் தேதி விடுதலைப் போராட்டத்துக்காக வெள்ளையனே வெளியேறு முழக்கத்தை முன் வைத்த நாளில், திருப்பூரில் கட்சி சாா்பில் மாநில மாநாடு நடைபெறுகிறது. இதில், ஜனநாயக விரோத முறையில் செயல்படும் மத்திய அரசை வெளியேறு என்ற முழக்கத்தை எழுப்ப உள்ளோம்.
தமிழகத்துக்கு வழங்கவேண்டிய ஜிஎஸ்டி பங்கு, பேரிடா் நிதியை முழுமையாக மத்திய அரசு வழங்கவில்லை. இப்படிப்பட்ட சூழலிலும் தமிழக முதல்வா் சிறப்பான ஆட்சியை நடத்தி வருகிறாா். மத்திய அரசு மாநில உரிமைகளை பறிக்கும் முயற்சிக்கு கடும் எதிா்ப்பு தெரிவிக்கப்படுகிறது. மேக்கேதாட்டுவில் அணை கட்டுவோம் என்று கா்நாடக அரசின் முயற்சிக்கு தமிழக அரசு எதிா்த்து அறிக்கை விடுவதோடு நீதிமன்றத்தை நாடியுள்ளது. திமுக தோ்தல் வாக்குறுதியாக அளித்த பல திட்டங்களை நிறைவேற்றி கொடுக்க வேண்டும்.
குறுவை சாகுபடி விவசாயிகளுக்கு வேளாண் இடுபொருள்களை கூட்டுறவு நிறுவனங்கள் மூலம் தட்டுப்பாடின்றி வழங்க வேண்டும். நெல்லுக்கான ஊக்கத் தொகையை உரிய காலத்தில் அறிவிக்க வேண்டும். ஊராட்சிக்கு ஒரு கொள்முதல் நிலையம் அமைக்க வேண்டும். கொள்முதல் செய்யப்பட்ட நெல்மூட்டைகளை பாதுகாப்பாக வைக்க கிடங்கு வசதிகளை மேம்படுத்த வேண்டும். மத்திய அரசு அக்னிபத் திட்டத்தை திரும்பப்பெற வேண்டும். பழைய முறைப்படி ராணுவத்துக்கு ஆள்கள் எடுக்க வேண்டும். மத்திய அரசின் சா்வாதிகார போக்கை மாற்ற குடியரசு தலைவராக போட்டியிடும் யஷ்வந்த் சின்காவை அனைத்து எதிா்க்கட்சிகளும் ஆதரிக்க வேண்டும் என்றாா்.
தீா்மானங்கள்: முன்னதாக நடைபெற்ற கூட்டத்தில், தலைஞாயிறு நடிப்பிசைப் புலவா் கே.ஆா். இராமசாமி கூட்டுறவு சா்க்கரை ஆலை மீண்டும் இயக்க நடவடிக்கை மேற்கொண்டுள்ள தமிழக அரசுக்கு நன்றி, அனைத்து துறை மாவட்ட அலுவலகங்களையும் மயிலாடுதுறையில் மாவட்டத்தில் இயங்க நடவடிக்கை எடுக்கவேண்டும், மயிலாடுதுறை முதல் தரங்கம்பாடி வரை ஆங்கிலேயா் காலத்தில் 1926-ஆம் ஆண்டு ரயில் சேவை தொடங்கப்பட்டு இயங்கியது. 1986-ஆம் ஆண்டு முதல் ரயில் சேவை நிறுத்தப்பட்டது. மீண்டும் ரயில் சேவையை தொடங்கி காரைக்கால் வரை சேவையை நீட்டிக்க மத்திய அரசு நடவடிக்கை எடுக்க வேண்டும் உள்ளிட்ட பல்வேறு தீா்மானங்கள் நிறைவேற்றப்பட்டன.
கட்சியின் மயிலாடுதுறை மாவட்ட செயலாளா் அ. சீனிவாசன் தலைமையில் நடைபெற்ற கூட்டத்தில், தேசிய குழு உறுப்பினா் கோ. பழனிசாமி, மாநில நிா்வாகக் குழு உறுப்பினா் வை. செல்வராசு, ஒன்றிய தலைவா் கிருஷ்ணமூா்த்தி உள்ளிட்டோா் பங்கேற்றனா்.