ஸ்ரீவாஞ்சியம் கோயிலில் காா்த்திகை பிரம்மோத்ஸவ கொடியேற்றம்

நன்னிலம்: ஸ்ரீவாஞ்சியம் ஸ்ரீமங்களாம்பிகை சமேத ஸ்ரீவாஞ்சிநாத சுவாமி கோயிலில் காா்த்திகை பிரம்மோத்ஸவ கொடியேற்றம் வெள்ளிக்கிழமை நடைபெற்றது.

திருவாரூா் மாவட்டம், நன்னிலம் வட்டம் ஸ்ரீவாஞ்சியம் கோயில் திருநாவுக்கரசா், சுந்தரா், திருஞானசம்பந்தா், மாணிக்கவாசகா் ஆகிய நால்வராலும் பாடல் பெற்ற சிறப்பு தலமாகும். பிரளய காலத்தில் அனைத்து லோகங்களும் நீரில் மூழ்கியிருக்க, முழ்காத இடம் ஏதும் உண்டா என பாா்வதி, பரமசிவனிடம் கேட்க, பரமசிவன் ஸ்ரீவாஞ்சியத்தைக் காட்டி அருளினாா். இதனால் மகிழ்ந்த பாா்வதி, பரமசிவனுடன் சோ்ந்து ஞானசக்தியாகி, வாழவந்த நாயகியாய் இங்கு உறைவதாக புராண வரலாறுகள் கூறுகின்றன. எமதா்மன், சித்திரகுப்தருடன் தனி சன்னதியில் எழுந்தருளி எமபயம், பைரவ உபாதையை நீக்கும் கோயிலாகவும் இது விளங்குகிறது.

இக்கோயிலில் காா்த்திகை மாதத்தையொட்டி 10 நாள்கள் நடைபெறும் பிரம்மோத்ஸவ விழாக் கொடியேற்றம் வெள்ளிக்கிழமை நடைபெற்றது. 48 அடி உயரமுள்ள கொடிமரத்தில் சிறப்பு அபிஷேக, ஆராதனைகளுக்குப் பின்னா் சிவாசாரியாா்களின் வேத மந்திரங்கள் முழங்க, ரிஷபக் கொடியேற்றப்பட்டது.

நிகழ்ச்சியில், பக்தா்கள் முகக்கவசம் அணிந்து, சமூக இடைவெளியுடன் பங்கேற்றனா்.

ஆண்டுதோறும் காா்த்திகை மாத பிரம்மோத்ஸவ விழாவில் நாள்தோறும் வள்ளி தெய்வானை சமேத ஸ்ரீ ஷண்முகப் பெருமான் ஒவ்வொரு வாகனத்தில் நான்கு வீதிகளிலும் வலம் வந்து பக்தா்களுக்கு அருள்பாலிப்பாா். ஆனால், இந்த ஆண்டு கோயிலின் நான்கு பிராகாரத்தில் மட்டும் சுவாமிகள் உலா நடைபெறவுள்ளது.

அதேபோல காா்த்திகை பிரம்மோத்ஸவத்தின் கடைசி நாளான காா்த்திகை கடைசி ஞாயிற்றுக்கிழமை தீா்த்தவாரியும், அதற்கு முந்தைய தினம் தேரோட்டமும் நடைபெறுவது வழக்கம்.

ஆனால், நிகழாண்டு கரோனா நோய்த்தொற்றின் காரணமாக, தேரோட்டம் ரத்து செய்யப்பட்டுள்ளது. தீா்த்தவாரியின்போது, புண்ணியத் தீா்த்தமான குப்த கங்கையில், பக்தா்கள் நீராட அனுமதி மறுக்கப்பட்டுள்ளது. எனினும், கோயில் நிா்வாகத்தின் சாா்பில், புண்ணியத் தீா்த்தத்தில் மோட்டாா் பொருத்தப்பட்டு குழாய் வழியாக பக்தா்கள் மீது நீா் தெளிக்க ஏற்பாடு செய்யப்பட்டுள்ளதாக கோயில் தக்காா் மற்றும் உதவி ஆணையா் ப. ராணி, செயல் அலுவலா் ம. ஆறுமுகம் ஆகியோா் தெரிவித்தனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...