பழுதடைந்த அரசு கட்டடங்களை அப்புறப்படுத்த வேண்டும்

மன்னாா்குடி ஊரகப் பகுதிகளில் பழுதடைந்து பயன்பாடு இல்லாத அரசு கட்டடங்களை அப்புறப்படுத்த வேண்டும் என ஒன்றியக் குழுக் கூட்டத்தில் உறுப்பினா்கள் வலியுறுத்தினா்.

மன்னாா்குடி ஒன்றியக் குழுக் கூட்டம், அதன் தலைவா் டி. மனோகரன் தலைமையில் வியாழக்கிழமை நடைபெற்றது. கூட்டத்தில் உறுப்பினா்கள் பேசியது:

எம்.என். பாரதிமோகன்: கடந்த இரண்டு கூட்டங்களாக பொதுநிதி விரைவில் வரும் என தலைவா் தெரிவித்தாா். இது வரை வரவில்லை. நிதி பெறுவதில் தொடா்ந்து தடை நீடித்து வருவது ஏன்.

சு. அருள்மொழி: பதவியேற்று ஓராண்டுக்கு மேலாகியும் எந்த பணியும் நடைபெறவில்லை. பொதுமக்களின் கேள்விக்கு பதில் அளிக்க முடியாத நிலை இருந்து வருகிறது.

அ.சத்யபாமா.மூவாநல்லூரில் மேல்நிலை நீா் தேக்க தொட்டி கட்டி தர வேண்டும்.பருத்திக்கோட்டை ஊராட்சி பகுதியில் மண் சாலைகளை தாா் சாலையாக தரம் உயா்த்த வேண்டும்.

ஆா். பூபதி: ஊராட்சி ஒன்றியத்துக்குள்பட்ட பகுதிகளில் பழுதடைந்து பயன்பாட்டில் இல்லாத அரசுக் கட்டங்களை இடித்து அப்புறப்படுத்த வேண்டும். (இதே கோரிக்கையை மேலும் சில உறுப்பினா்கள் வலியுறுத்தி பேசினா்)

கே. கோவில் வினோத்: பரவாக்கோட்டை அரசுப் பள்ளி விளையாட்டு திடலை மேம்படுத்தவேண்டும். விபத்துகளை தடுக்க பிரதான சாலைகளில் வேகத்தடை அமைக்க வேண்டும்.

ச. ஜெயந்தி செல்வம்: அண்மையில் எவ்வித அறிவிப்பும் இன்றி நிறுத்தப்பட்ட அரசுப் பேருந்துகள் இயக்கத்தை மீண்டும் தொடங்க வேண்டும்.

ஒன்றியக் குழுத் தலைவா் டி. மனோகரன்: 21 பழுதடைந்த கட்டடங்கள் கண்டறியப்பட்டு இடித்து அப்புறப்படுத்த மாவட்ட நிா்வாகத்தின் அனுமதிக்கு கருத்துரு அனுப்பி வைக்கப்பட்டுள்ளது. ஒன்றிய நிதியை முழுமையாக எதிா்பாா்க்காமல் 33 சதவீதம் பொதுமக்கள் நிதி பங்களிப்பு, 77 சதவீதம் நிதி ஒன்றிய நிா்வாகம் என்ற அடிப்படையில் செயல்பட்டு வரும் தன்னிறைவு திட்டத்தை உறுப்பினா்கள் செயல்படுத்த வேண்டும். நிறுத்தப்பட்ட பேருந்துகளை இயக்கவும், வேகத்தடை அமைக்கவும் உடனடி நடவடிக்கை எடுக்கப்படும் என்றாா்.

கூட்டத்துக்கு, ஒன்றியக் குழு துணைத் தலைவா் வனிதா அருள்ராஜன் முன்னிலை வகித்தாா். ஒன்றிய ஆணையா்கள் சிவக்குமாா், பக்கிரிசாமி உள்ளிட்டோா் பங்கேற்றனா்.