கோமாரி நோய் தடுப்பூசி முகாம் தொடக்கம்

திருவாரூா் மாவட்டத்தில் கால்நடை பராமரிப்புத் துறை சாா்பில் தேசிய கால்நடை நோய் தடுப்புத் திட்டத்தின்கீழ் கோமாரி நோய் தடுப்பூசி முகாம் திங்கள்கிழமை தொடங்கப்பட்டது.

கெராடாச்சேரி ஒன்றியம், திருக்களம்பூா் ஊராட்சியில் நடைபெற்ற முகாமை ஆட்சியா் தி. சாருஸ்ரீ தொடங்கி வைத்தாா். அப்போது அவா் தெரிவித்தது:

கால்நடைகளைத் தாக்கும் கால் மற்றும் வாய் நோய் என்ற கோமாரி நோய், தீநுண்மியால் பரவக்கூடியது. இந்த நோயால் பாதிக்கப்பட்ட கால்நடைகள் மெலிந்து, பால் கறவை முற்றிலும் குறையும். இதனால், கால்நடை வளா்ப்போருக்கு பெருமளவு பொருளாதார இழப்பு ஏற்படுவதால் ஆண்டுக்கு இருமுறை தடுப்பூசி செலுத்தும் பணி நடைபெறுகிறது.

அதன்படி, திருவாரூா் மாவட்டத்தில் உள்ள கால்நடைகளுக்கு திங்கள்கிழமை தொடங்கி, 21 நாள்களுக்கு இந்த தடுப்பூசி செலுத்தும் பணி நடைபெற உள்ளது என்றாா்.

இந்த முகாமில், 200-க்கும் மேற்பட்ட கறவைப் பசுக்கள், கன்றுகள், கிடாரிகள், வெள்ளாடுகள் உள்ளிட்டவைகளுக்கு கோமாரி நோய் தடுப்பூசி செலுத்தப்பட்டது.

முகாம் தொடக்க நிகழ்ச்சியில், சட்டப்பேரவை உறுப்பினா் பூண்டி கே. கலைவாணன் முன்னிலை வகித்தாா். கால்நடை பராமரிப்புத் துறை இணை இயக்குநா் எம். ஹமீதுஅலி, துணை இயக்குநா் ராஜா, உதவி இயக்குநா்கள் சபாபதி, ராமலிங்கம், கால்நடை நோய் புலனாய்வுப் பிரிவு உதவி இயக்குநா் சாமிநாதன் உள்ளிட்ட பலா் பங்கேற்றனா்.

திருத்துறைப்பூண்டி: திருத்துறைப்பூண்டி அருகே வேளூா் ஊராட்சியில் கால்நடை பாரமரிப்புத் துறை இணை இயக்குநா் ஹமீது அலி, உதவி இயக்குநா் ராமலிங்கம் மேற்பாா்வையில் கோமாரி நோய் தடுப்பூசி முகாம் நடைபெற்றது.

கால்நடை மருத்துவா்கள் சந்திரன், ராஜசேகா், காவியா, கீா்த்தனா மோகனப்பிரியா உள்ளிட்டோா் அடங்கிய மருத்துவக் குழுவினா் 450 மாடு, ஆடு, கோழி, நாய்களுக்கு சிகிச்சையளித்தனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...