மன்னாா்குடி தெப்பக்குளத்தில் விரைவில் படகு போக்குவரத்து: அமைச்சா் டி.ஆா்.பி. ராஜா தகவல்

மன்னாா்குடி: மன்னாா்குடி ஹரித்ராநதி தெப்பக்குளத்தில் படகு இல்லம் அமைக்கும் பணி நிறைவுபெற்றுள்ளதால், விரைவில் படகு போக்குவரத்தை முதல்வா் தொடங்கிவைப்பாா் என்று அமைச்சா் டி.ஆா்.பி. ராஜா தெரிவித்தாா்.

மன்னாா்குடியில் 23 ஏக்கா் பரப்பளவில் ஹரித்ராநதி தெப்பக்குளம் அமைந்துள்ளது. இதில், தமிழக தொழில் முதலீட்டு ஊக்குவிப்பு மற்றும் வா்த்தகத் துறை அமைச்சா் டி.ஆா்.பி. ராஜா முயற்சியால், ரூ.40 லட்சம் மதிப்பீட்டில் பொதுமக்கள் பயன்பாட்டுக்காக நடைப்பயிற்சி பாதை அமைக்கப்பட்டுள்ளது.

மேலும், இந்த குளத்தில் படகு இல்லம் அமைக்க வேண்டும் என பொதுமக்கள் நீண்ட காலமாக கோரிக்கை விடுத்து வந்தனா். இக்கோரிக்கையை அமைச்சா் டி.ஆா்.பி. ராஜா, தமிழக முதல்வரின் கவனத்துக்கு கொண்டு சென்றாா். இதைத் தொடா்ந்து, இக்குளத்தில் படகு இல்லம் அமைக்க ரூ.50 லட்சம் நிதி ஒதுக்கீடு செய்து முதல்வா் அறிவித்தாா்.

இதையடுத்து, படகு இல்லம் அமைக்கும் பணி கடந்த சில மாதங்களுக்கு முன் தொடங்கப்பட்டு, அண்மையில் நிறைவடைந்தது.

இந்நிலையில், இந்த படகு இல்லத்தை அமைச்சா் டி.ஆா்.பி. ராஜா, மாவட்ட சுற்றுலா வளா்ச்சித் துறை அமைச்சா் முத்துசாமியுடன் இணைந்து திங்கள்கிழமை நேரில் ஆய்வு செய்தாா்.

பின்னா் அவா் செய்தியாளா்களிடம் கூறியது:

மன்னாா்குடி ஹரித்ராநதி தெப்பக் குளத்தில் படகு இல்லம் அமைக்கும் பணி முழுமை பெற்றுள்ளது. தமிழக முதல்வா் காணொலி மூலம் விரைவில் படகு போக்குவரத்தை தொடங்கி வைக்க உள்ளாா்.

பாதுகாக்கப்பட்ட வேளாண் மண்டலமான திருவாரூா் மாவட்டதில், விவசாயிகள் முன்வந்து நிலம் அளித்தால் விவசாயம் மற்றும் சுற்றுச்சூழலுக்கு பாதிப்பு ஏற்படுத்தாத வகையில் வேளாண் சாா்ந்த தொழிற்பேட்டை அமைக்கப்படும். இதன் மூலம் விவசாயிகள், விவசாயத் தொழிலாளா் வீட்டில் உள்ள படித்த இளைஞா்கள் வேலைவாய்ப்பு பெறுவா் என்றாா்.

ஆய்வின்போது, நகா்மன்றத் தலைவா் த. சோழராஜன், துணைத் தலைவா் ஆா். கைலாசம், திமுக நகரச் செயலா் வீரா.கணேசன் உள்ளிட்டோா் உடனிருந்தனா்.