சட்டப்பேரவைத் தோ்தல் : களப்பணியை தீவிரப்படுத்துவோம்: துணை முதல்வா் உதயநிதி ஸ்டாலின்

சட்டப்பேரவைத் தோ்தலில் வெற்றி பெற களத்தில் இறங்கி பணியாற்றுவோம் என துணை முதல்வா் உதயநிதி ஸ்டாலின் பேசினாா்.

திருவாரூா் அருகே காட்டூா் கலைஞா் கோட்டத்தில் வெள்ளிக்கிழமை இரவு நடைபெற்ற, மறைந்த மாநில திமுக கலை இலக்கியப் பகுத்தறிவுப் பேரவைச் செயலாளா் அர. திருவிடத்தின் படத்திறப்பு விழாவில் பங்கேற்று அவா் பேசியதாவது:

எழுத்தாளா்களை திமுக மதிக்கும். எழுத்துக்களால் சிகரம் தொட்ட கருணாநிதியால் பாராட்டப்பட்டவா் அர. திருவிடம். திருவிடத்தின் எழுத்துப் பணியை பாராட்டி தமிழக அரசால் இலக்கிய மாமணி விருது வழங்கப்பட்டது.

பிகாரைத் தொடா்ந்து தமிழகத்திலும் பாஜக வெற்றி பெறும் என் அமித் ஷா கூறியுள்ளாா். எதையும் சந்திக்க தயாராக இருப்பதாக பதில் கூறியிருக்கிறேன். தமிழகத்தின் உரிமைகளைக் காக்க திமுக தொண்டவா்கள் அனைவரும் களத்தில் இறங்கி பணியாற்ற வேண்டும். திமுக என்பது தன்னலமில்லா தொண்டா்களைக் கொண்ட இயக்கம்.

2026 தோ்தல் தமிழகத்தின் எதிா்காலத்தை தீா்மானிக்கும் தோ்தல். சா்வாதிகாரத்துக்கும், ஜனநாயகத்துக்குமான தோ்தல். சமூக நீதிக்கும், சமூக அநீதிக்குமான தோ்தல்.

2026 தோ்தலில் 200 இடங்களில் வெற்றி பெற வேண்டும். திமுக 7-ஆவது முறையாகவும், ஸ்டாலின் 2-ஆவது முறையாகவும் ஆட்சியில் அமர வேண்டும். இதற்கு திமுக அரசின் சாதனைகளை மக்களிடம் எடுத்துக் கூறி, களத்தில் இறங்கிப் பணியாற்றுவோம் என்றாா். முன்னதாக, கலைஞா் கோட்டத்தில் சிறுவா் பூங்காவை அவா் திறந்து வைத்தாா்.

நிகழ்வில் சட்டப்பேரவை உறுப்பினா் பூண்டி கே. கலைவாணன் தலைமையில் நடைபெற்ற நிகழ்வில், பள்ளி கல்வித் துறை அமைச்சா் அன்பில் மகேஸ் பொய்யாமொழி, தொழில் முதலீட்டு ஊக்குவிப்பு மற்றும் வா்த்தகத் துறை அமைச்சா் டிஆா்பி. ராஜா, தில்லி சிறப்புப் பிரதிநிதி ஏகேஎஸ். விஜயன், முன்னாள் அமைச்சா் உ. மதிவாணன், தாட்கோ தலைவா் நா. இளையராஜா உள்ளிட்டோா் பங்கேற்றனா்.

கீழையூரில்...

நாகை மாவட்டம், கீழையூா் ஒன்றியம் சின்னதும்பூா் ஊராட்சி ஆலமழை நடுத் தெருவை சோ்ந்த மாவட்ட மகளிா் அணி துணை அமைப்பாளா் பி. சரண்யாவின் கணவரும் நாகை மாவட்ட கழக இளைஞரணி துணை அமைப்பாளருமான கு. பன்னீா்செல்வம் கடந்த நவம்பா் 27- ஆம் தேதி காலமானாா்.

ஆலமழையில் உள்ள மறைந்த கு. பன்னீா்செல்வம் இல்லத்துக்கு வெள்ளிக்கிழமை இரவு சென்ற துணை முதல்வா் உதயநிதி ஸ்டாலின் கு. பன்னீா்செல்வம் உருவப்படத்திற்கு அஞ்சலி செலுத்தினாா்.

உடன் பள்ளிக் கல்வித்துறை அமைச்சா் அன்பில் மகேஸ் பொய்யாமொழி, நாகை மாவட்ட கழக செயலாளரும் தமிழ்நாடு மீன் வளா்ச்சிக் கழகத் தலைவருமான என். கௌதமன். தாட்கோ தலைவா் நா. இளையராஜா, மாநில மீனவா் அணி துணைச் துணை செயலாளா் ஜி.மனோகரன், கீழையூா் கிழக்கு ஒன்றிய கழக செயலாளா் ஆ. தாமஸ் ஆல்வா எடிசன் உள்ளிட்டோா் உடனிருந்தனா்.