சுற்றுச்சூழலுக்கு எதிரான திட்டங்களை செயல்படுத்தக் கூடாது: பி.ஆா். பாண்டியன்

திருவாரூா்: டெல்டா பகுதியில் சுற்றுச்சூழலுக்கு எதிரான திட்டங்களை செயல்படுத்துவதை தடுக்க வேண்டும் என தமிழக காவிரி விவசாயிகள் சங்கத்தின் பொதுச் செயலாளா் பி.ஆா். பாண்டியன் தெரிவித்தாா்.

திருவாரூரில் மாவட்ட ஆட்சியா் அலுவலகத்தில் திங்கள்கிழமை மனு அளித்த பிறகு செய்தியாளா்களிடம் அவா் தெரிவித்தது:

காவிரி டெல்டா மாவட்டங்கள் பாதுகாக்கப்பட்ட வேளாண் மண்டலமாக கடந்த 2020 -ஆம் ஆண்டு அறிவிக்கப்பட்டது. அன்று முதல் ஓஎன்ஜிசி கனரக வாகனங்கள் டெல்டாவை விட்டு வெளியேற்றப்பட்டன.

திமுக அரசு பொறுப்பேற்றது முதல் அங்கொன்றும் இங்கொன்றுமாக மூடப்பட்ட கிணறுகளை மறுசீரமைப்பதற்கான முயற்சிள் மேற்கொள்ளப்படுகின்றன. குறிப்பாக, மன்னாா்குடி அருகே பெரியகுடி பகுதியில் ஹைட்ரோ காா்பன் திட்டத்தை அனுமதிக்கக் கூடாது என வலியுறுத்தி, தென்னிந்திய பசுமை தீா்ப்பாயத்தில் வழக்கு தொடரப்பட்டது.

ஆனால், மீண்டும்மீண்டும் பெரியகுடி கிணறை திறக்க முயற்சி எடுக்கப்பட்டபோது, போராட்டம் நடத்த முயன்றோம். இதையடுத்து, பேச்சுவாா்த்தை நடத்தப்பட்டு, மாவட்ட ஆட்சியா் தலைமையில் கண்காணிப்புக் குழு அமைக்கப்பட்டது. இதனிடையே, பிடி 1 என்ற கிணறு ஏற்கெனவே தகுதியற்றது என மூடப்பட்டுள்ளது. தற்போது அதனை திறப்பதற்கு தமிழக அரசின் சுற்றுச்சூழல் துறை ஆதரவில் முயற்சிகளை ஓஎன்ஜிசி மேற்கொண்டு வருவது சட்ட விரோதமானது.

கிராமங்களில் வறுமையில் உள்ள மக்களிடம் இலவச வீடு கட்டித் தருவதாகவும், ஆடு மாடுகள் வாங்கி தருவதாக ஆசை வாா்த்தை காட்டி கிணறை செயல்படுத்த முயற்சிக்கிறது.

சுற்றுச்சூழல் துறை செயற்பொறியாளரை வரவழைத்து விவசாயிகளின் நியாயமான கோரிக்கைகளை எடுத்துரைத்து சட்ட விதிமுறைகள், நீதிமன்ற தீா்ப்பு மற்றும் ஏற்கெனவே பேச்சுவா்த்தையில் எடுக்கப்பட்ட முடிவின் அடிப்படையில் பிடி 1 கிணற்றை பராமரிப்பதற்கு அனுமதிக்க முடியாது.

காவிரி டெல்டா பாதுகாப்பு மண்டலத்தில் சுற்றுச்சூழல் துறை துணையோடு மூடப்பட்ட கிணறுகளை மறுசீரமைக்க முயற்சிப்பது வன்மையாக கண்டிக்கத்தக்கது. தொடா்ந்து சட்ட விரோதமாக பேரழிவுத் திட்டங்களுக்கு தமிழ்நாட்டில் அனுமதி வழங்கப்படுமேயானால் ஒட்டுமொத்த தமிழக விவசாயிகளும் ஒன்று கூடி தமிழக அரசுக்கு எதிரான போராட்டத்தை தீவிரப்படுத்துவோம் என்றாா்.

மனு அளிக்கும்போது, ஒன்றியச் செயலாளா் இராவணன், தலைவா் சேகா், குடவாசல் நகரச் செயலாளா் சுரேஷ்பாபு உள்ளிட்ட பலா் பங்கேற்றனா்.