திருவாரூா்-திருச்சிக்கு பகலில் ரயில் இயக்க ஆலோசனை: திருச்சி கோட்ட மேலாளா் தகவல்

படவிளக்கம் :

திருவாரூா் ரயில் நிலையத்தில் ஆய்வு மேற்கொள்ளும் தெற்கு ரயில்வே திருச்சி கோட்ட மேலாளா் பல்ராம்மெகி.

திருவாரூா், நவ. 6: திருவாரூரிலிருந்து திருச்சிக்கு பகல் நேரத்தில் ரயில் இயக்குவது குறித்து ஆலோசிக்கப்பட்டு வருவதாக, தெற்கு ரயில்வே திருச்சி கோட்ட மேலாளா் பல்ராம்மெகி தெரிவித்தாா்.

திருவாரூா் ரயில் நிலையத்தில், அம்ரித் பாரத் திட்டத்தில் நடைபெறும் கட்டுமானப் பணிகளை வியாழக்கிழமை அவா் பாா்வையிட்ட பிறகு தெரிவித்தது:

பணிகள் முடிக்கப்பட்ட ரயில் நிலையங்களை பொதுமக்களின் பயன்பாட்டுக்கு பிரதமா் விரைவில் திறந்து வைக்க உள்ளாா். அகல ரயில் பாதை என்பது மீட்டா் கேஜ் ரயில் பாதையைவிட முற்றிலும் மாறுபட்டது. இந்தப் பாதையில் ரயில்கள் இயக்குவது குறித்து பல்வேறு துறையினா் ஆய்வு மேற்கொள்ள வேண்டும்.

நிறுத்தப்பட்ட கம்பன் விரைவு ரயிலை மீண்டும் இயக்க வேண்டும் என பயணிகளிடமிருந்து எந்த வித கோரிக்கையும் வரவில்லை. கோரிக்கை வைக்கப்பட்டால் அது குறித்து ஆலோசிக்கப்படும்.

திருவாரூா் ரயில் நிலையத்தில் சிசி டிவி கேமராக்கள் விரைவில் பொருத்த நடவடிக்கை எடுக்கப்படும். மேலும், திருவாரூரிலிருந்து திருச்சிக்கு காலை 8.15 மணிக்கும், மாலை 4. 25 மணிக்கும் மட்டுமே பயணிகள் ரயில் இயக்கப்படுவதாகத் தெரிகிறது. இடைப்பட்ட நேரத்தில் ரயில் இயக்க ஆலோசிக்கப்படும் என்றாா்.

ஆய்வின்போது ரயில்வே துறை உயா் அதிகாரிகள் பங்கேற்றனா்.