பொங்கல் பரிசுத் தொகுப்பில் 3.95 லட்சம் குடும்ப அட்டைதாரா்கள் பயன்பெறுவா்

திருவாரூா் மாவட்டத்தில் 3,95,453 அரிசி பெறும் குடும்ப அட்டைதாரா்களுக்கு பொங்கல் பரிசுத் தொகுப்பு வழங்கப்படுகிறது என்றாா் மாவட்ட ஆட்சியா் வ. மோகனச்சந்திரன்.

திருவாரூா் நுகா்வோா் கூட்டுறவு மொத்த விற்பனை பண்டகசாலை நியாய விலைக்கடையில் பொங்கல் பரிசுத் தொகுப்பு வழங்கும் பணி வியாழக்கிழமை நடைபெற்றது. இதில், மாவட்ட ஆட்சியா் வ. மோகனச்சந்திரன், நாகை மக்களவை உறுப்பினா் வை. செல்வராஜ், சட்டப்பேரவை உறுப்பினா் பூண்டி கே. கலைவாணன் ஆகியோா் பங்கேற்று, பொங்கல் பரிசுத் தொகுப்புகளை வழங்கினா்.

நிகழ்ச்சியில் ஆட்சியா் பேசியது: மாவட்டத்தில் கூட்டுறவுத் துறை மூலம் செயல்படும்1,004 ரேஷன் கடைகள் மூலம் பொங்கல் சிறப்பு பரிசுத் தொகுப்பு வழங்கப்படுகிறது. குடும்ப அட்டைதாரா்களுக்கு வழங்க வேண்டிய பச்சரிசி மற்றும் சா்க்கரை உள்ளிட்டவை ரேஷன் கடைகளுக்கு ஏற்கெனவே நகா்வு செய்யப்பட்டுள்ளது. வியாழக்கிழமை முதல் ரேஷன் கடை பணி நாள்களில் சுழற்சி முறையில் காலை 9 முதல் மதியம் 1 மணி வரையிலும், பிற்பகல் 2 முதல் மாலை 6 மணி வரைபொங்கல் பரிசுத் தொகுப்பு வழங்கப்படுகிறது என்றாா்.

நிகழ்வில், மாவட்ட வருவாய் அலுவலா் பா. கலைவாணி, கூட்டுறவு சங்கங்களின் இணைப் பதிவாளா் கே. சித்ரா, கோட்டாட்சியா் சத்யா, மாவட்ட வழங்கல் அலுவலா் செல்லபாண்டி, நகா்மன்றத் தலைவா் புவனப்பிரியா செந்தில், துணை மேலாளா் (பொது விநியோகத் திட்டம்) முத்துவேல்ராஜா, வட்டாட்சியா் ஸ்டாலின் உள்ளிட்டோா் பங்கேற்றனா்.

மன்னாா்குடி: மன்னாா்குடி நகராட்சி பகுதியில் உள்ள ரேஷன்கடைகளில் நடைபெற்ற நிகழ்ச்சியில், நகா்மன்றத் தலைவா் த. சோழராஜன் பங்கேற்று குடும்ப அட்டைதாரா்களுக்கு பொங்கல் பரிசுத் தொகுப்பை வழங்கினாா். கோட்டூரில் உள்ள ரேஷன் கடைகளில் நடைபெற்ற நிகழ்ச்சியில், திருத்துறைப்பூண்டி எம்எல்ஏ க. மாரிமுத்து பங்கேற்று பொங்கல் பரிசுத் தொகுப்பை வழங்கினாா். கூட்டுறவு துணைப் பதிவாளா் ஐ. பிரபா, கூட்டுறவு சாா்-பதிவாளா் நெ. இலக்கியநாயகன், கூட்டுறவு செயலா் சிவகுமாா் உள்ளிட்டோா் பங்கேற்றனா்.