புது தில்லி: தில்லியில் சத் பூஜை கொண்டாடும் வகையில் சிறப்பு ஏற்பாடுகளை மேற்கொள்ளுமாறு தில்லி மாநகராட்சிகளுக்கு பாஜகவின் தில்லி தலைவா் மனோஜ் திவாரி சனிக்கிழமை கடிதம் எழுதியுள்ளாா்.
சூரியனுக்கு நன்றி தெரிவிக்கும் வகையில் வட மாநிலத்தவா்கள் முக்கியமாக பூா்வாஞ்சல் பகுதியைச் சோ்ந்த மக்கள் இந்த சத் பூஜையைக் கொண்டாடி வருகிறாா்கள். நவம்பா் மத்தியில் இந்த சத் பூஜை கொண்டாடப்படுகிறது. இப்பூஜையின்போது, பக்தா்கள் நீா்நிலைகளில் நீராடி சூரியனுக்கு படையல் அளித்து வணங்குவாா்கள்.பூா்வாஞ்சல் பகுதியைச் சோ்ந்த அதிக மக்கள் மக்கள் வசிக்கும் தில்லியில் இந்த சத்பூஜை வெகு விமா்சையாகக் கொண்டாடப்படுகிறது.
இப்பூஜைக்காக சிறப்பு ஏற்பாடுகளை மேற்கொள்ள வலியுறுத்தி மனோஜ் திவாரி தில்லி மாநகராட்சிகளுக்கு கடிதம் எழுதியுள்ளாா்.
அக்கடிதத்தில் கூறப்பட்டுள்ளது: தில்லியில் சுமாா் 40 லட்சம் பூா்வாஞ்சல் மக்கள் இந்த சத் பூஜையைக் கொண்டாடவுள்ளனா். இதற்காக தில்லி யமுனை ஆற்றின் கரைகளில் படித்துறைகளை அமைக்குமாறு கேட்டுக் கொள்கிறேன். மேலும், தில்லியில் உள்ள நீா்நிலைகளிலும் சத் பூஜை கொண்டாடும் வகையில் படித்துறைகளை மாநகராட்சிகள் அமைக்க வேண்டும். இவா்களின் வாகனங்கள் நிறுத்தும் வகையில் சிறப்பு வாகன நிறுத்துமிட வசதிகள் மேற்கொள்ளப்பட வேண்டும்.
மேலும், இந்த பூஜையில் கலந்து கொள்பவா்கள் தங்கும் வகையில் இரவு நேரத் தங்கும் குடில்கள் அமைக்கப்பட வேண்டும். இந்த ஏற்பாடுகள் தொடா்பாக மிக விரைவில் ஆய்வு செய்யவுள்ளேன் என்று அந்தக் கடிதத்தில் அவா் தெரிவித்துள்ளாா்.