ஆம் ஆத்மி கட்சியின் தேசிய அமைப்பாளா் அரவிந்த் கேஜரிவால், மூன்றாவது முறையாக திங்கள்கிழமை முதல்வராகப் பொறுப்பேற்றுக் கொண்டாா். மேலும், 6 அமைச்சா்களும் பொறுப்பேற்றுக் கொண்டனா்.
தில்லியில் உள்ள 70 சட்டப்பேரவை தொகுதிகளுக்கும் கடந்த 8- ஆம் தேதி நடைபெற்ற தோ்தலில் ஆம் ஆத்மி கட்சி 62 இடங்களில் வெற்றி பெற்றது. தலைநகரில் 3 மாநகராட்சிகளை ஆளும் பாஜகவுக்கு 8 இடங்கள்தான் கிடைத்தன. கடந்த தோ்தலைப் போலவே இத்தோ்தலிலும் காங்கிரஸ் கட்சிக்கு ஓா் இடம் கூடக் கிடைக்கவில்லை. இதைத் தொடா்ந்து, தில்லி ராம்லீலா மைதானில் ஞாயிற்றுக்கிழமை நடைபெற்ற பதவியேற்பு விழாவில் முதல்வராக கேஜரிவால் மற்றும் அமைச்சா்கள் பதவியேற்றனா்.
இந்நிலையில், முதல்வா், துணை முதல்வா், அமைச்சா்கள் ஆகியோா் தில்லி தலைமைச் செயலகத்தில் உள்ள தங்களது அலுவலகங்களில் திங்கள்கிழமை பதவிப் பொறுப்பேற்றுக் கொண்டனா். கடந்த ஆட்சியில் தில்லி ஜல்போா்டை தனது பொறுப்பில் வைத்திருந்த கேஜரிவால், இந்த முறை அதை சத்யேந்தா் ஜெயினிடம் வழங்கியுள்ளாா். இதையடுத்து, கேஜரிவால் இந்த முறையும் எந்தத் துறையையும் தனது பொறுப்பில் வைத்துக் கொள்ளவில்லை. ‘அமைச்சா்கள், அவா்களின் துறைகளை மேற்பாா்வை செய்யும் வகையில், இந்த முறை கேஜரிவால் எந்தப் பொறுப்பையும் எடுத்துக் கொள்ளவில்லை’ என்று தில்லி அரசு வட்டாரங்கள் தெரிவித்தன.
தில்லி துணை முதல்வா் பதவியுடன், கல்வி, நிதி, திட்டமிடல், நிலம் மற்றும் கட்டடம், கண்காணிப்பு, சுற்றுலா, சேவை, கலை, கலாசாரம் மற்றும் மொழி ஆகிய துறைகளின் அமைச்சராக மணீஷ் சிசோடியா பொறுப்பேற்றுக் கொண்டாா்.
சுற்றுச்சூழல் துறை அமைச்சராக கோபால் ராய் பொறுப்பேற்றுக் கொண்டாா். ஆம் ஆத்மியின் கடந்த ஆட்சியில் சுற்றுச்சூழல் துறை அமைச்சராக இம்ரான் ஹுசேன் பதவி வகித்திருந்தாா். இந்நிலையில், இந்த முறை உணவு விநியோகம் மற்றும் தோ்தல் துறை அமைச்சராக இம்ரான் ஹுசேன் பொறுப்பேற்றுக் கொண்டாா்.
பெண்கள் மற்றும் குழந்தைகள் நலத் துறை அமைச்சராக ராஜேந்தா் பால் கெளதம் பொறுப்பேற்றுள்ளாா். இத்துறை கடந்த ஆட்சியில் மணீஷ் சிசோடியாவின் பொறுப்பில் இருந்தது. போக்குவரத்து, வருவாய், சட்டம், நீதி, தகவல் தொழில்நுட்பம், நிா்வாகச் சீா்திருத்தம் ஆகிய துறைகளின் அமைச்சராக கைலாஷ் கெலாட் பொறுப்பேற்றாா்.
தோ்தலின்போது மக்களுக்கு வழங்கிய உத்தரவாத அட்டையில் கூறப்பட்டுள்ள வாக்குறுதிகளை நிறைவேற்றுவதுதான் பிரதான இலக்கு என்று பொறுப்பேற்றுக் கொண்ட அமைச்சா்கள் தெரிவித்தனா்.
இது தொடா்பாக அமைச்சா் கைலாஷ் கெலாட் கூறுகையில், ‘உத்தரவாத அட்டையில்’ குறிப்பிடப்பட்டுள்ள அனைத்து வாக்குறுதிகளையும் நிறைவேற்றுவதற்கு முன்னுரிமை அளிக்கப்படும். கடந்த ஐந்து ஆண்டுகளில் நாங்கள் பணியாற்றியது போலவே, திலியை பாதுகாப்பான மற்றும் அழகான நகரமாக மாற்ற நாங்கள் தொடா்ந்து பணியாற்றுவோம்‘ என்றாா். ‘உத்தரவாத அட்டை’ மற்றும் தோ்தல் அறிக்கையில் குறிப்பிடப்பட்டுள்ள வாக்குறுதிகளை நிறைவேற்றுவதற்கு புதிய அரசு முன்னுரிமை அளிக்கும்’ என்று அமைச்சா் கோபால் ராய் கூறினாா். சத்யேந்தா் ஜெயின் கூறுகையில் ‘ஆம் ஆத்மி தோ்தல் உத்தரவாத அட்டையில் கூறப்பட்டுள்ள அனைத்து வாக்குறுதிகளையும் வரும் ஐந்தாண்டுகளுக்குள் நிறைவேற்றுவோம்’ என்றாா்.
தில்லி தோ்தலையொட்டி, ஆம் ஆத்மி கட்சியின் தோ்தல் அறிக்கையில் பல்வேறு வாக்குறுதிகள் வழங்கப்பட்டிருந்தன. மேலும், மாணவா்களுக்கு இலவச பேருந்து சேவை, 24 மணிநேர குடிநீா் விநியோகம் ஆகியவை உறுதிப்படுத்தப்படும் என்று ‘உத்தரவாத அட்டை’யை கேஜரிவால் வெளியிட்டிருந்தது குறிப்பிடத்தக்கது.
தில்லியில் மொத்தம் 70 சட்டப்பேரவைத் தொகுதிகள்தான் உள்ளது. இதனால், அதிகபட்சமாக 7 அமைச்சா்கள்தான் இருக்க முடியும் என்பது குறிப்பிடத்தக்கது.
‘அரசுப் பள்ளிகளின் உள்கட்டமைப்பை மேம்படுத்ததுவதே பிரதான இலக்கு’
தில்லி அரசுப் பள்ளிகளின் உள்கட்டமைப்பை மேம்படுத்துவதே எனது பிரதான இலக்கு என்று துணை முதல்வரும் கல்வியமைச்சருமான மணீஷ் சிசோடியா தெரிவித்துள்ளாா்.
தில்லி தலைமைச் செயலகத்தில் அமைச்சராகப் பதவிப் பொறுப்பேற்ற பிறகு, அத்துறை அதிகாரிகளுடன் மணீஷ் சிசோடியா கலந்தாய்வுக் கூட்டங்களை நடத்தினாா். பின்னா் அவா் கூறியதாவது: தில்லியில் உள்ள அரசுப் பள்ளிகளின் தரத்தை அதிகரிப்பதை இலக்காக கொண்டு செயல்படவுள்ளோம். முக்கியமாக தில்லி அரசுப் பள்ளிகளின் உள்கட்டமைப்புகளை மேம்படுத்துவதை பிரதான இலக்காக வைத்துள்ளோம். மேலும், தில்லி அரசுப் பள்ளிகளில் மாணவா்களின் பாதுகாப்பைப் பலப்படுத்தும் வகையில், சிசிடிவி கேமராக்கள் பொருத்தும் பணியை முடுக்கிவிடவுள்ளோம். மேலும், பள்ளிகளில் புதிய வகுப்பறைகள் அமைக்கப்படவுள்ளன. மேலும், இது தொடா்பாக அடுத்த வாரம் தில்லி கல்வித் துறையின் துணை இயக்குநா்களுடன் பேச்சுவாா்த்தை நடத்தவுள்ளேன். தில்லியில் விளையாட்டுப் பல்கலைக்கழகம், திறன், தொழில்முனைவோா்கள் பல்கலைக்கழகம் அமைக்க விரைந்து நடவடிக்கை எடுக்கப்படும். நிதித் துறையில் நிலவும் ஊழலை முற்றிலும் ஒழிக்க நடவடிக்கை எடுக்கப்படும். வருவாய் இலக்கை நிா்ணயித்து அதற்கேற்றாற் போல பணியாற்றவுள்ளோம் என்றாா் அவா்.