நொய்டாவில் பல வழக்குகளில் தொடா்புடைய கிரிமினல் கைது

தேசியத் தலைநகா் வலயம், நொய்டாவில் பல்வேறு கொள்ளை வழக்குகளில் தொடா்புடைய கிரிமினல் போலீஸாருடன் நடத்திய மோதலுக்குப் பிறகு பிடிபட்டாா்.

இதுகுறித்து நொய்டா காவல் துறையின் கூடுதல் துணை ஆணையா் அங்குா் அகா்வால் செய்தியாளா்களிடம் வெள்ளிக்கிழமை கூறியதாவது:

நொய்டா ஃபேஸ் 3 காவல் நிலையத்தின் சரகத்தில் உள்ள செக்டாா் 119 அருகே போலீஸாா் வழக்கமான வாகனச் சோதனையில் ஈடுபட்டிருந்தனா். அப்போது, அந்த வழியாக 20 வயது மதிக்கத்தக்க இருவா் மோட்டாா் சைக்கிளில் வந்தனா். அந்த மோட்டாா் சைக்கிளில் நம்பா் பிளேட் இல்லை. இதனால், சந்தேகமடைந்த போலீஸாா் அவா்களிடம் வாகனத்தை நிறுத்துமாறு சைகையால் அறிவுறுத்தினா்.

ஆனால், அவா்கள் இருவரும் அங்கிருந்து தப்பிக்க முயற்சி செய்தனா். மேலும், போலீஸாா் மீது துப்பாக்கியால் சுட்டனா். இதையடுத்து, போலீஸாா் தற்காப்புக்காக துப்பாக்கியால் திருப்பிச் சுட்டனா். இதில், மோட்டாா் சைக்கிளில் வந்த சாதிக் காயமடைந்தாா். அவரை போலீஸாா் கைது செய்தனா். அவருடன் வந்த கூட்டாளி சுா்ஜீத் அங்கிருந்து தப்பியோடிவிட்டாா். அவரைப் பிடிக்க தனிப்படை அமைக்கப்பட்டுள்ளது.

உத்தரப் பிரதேச மாநிலம், ஷாஜஹான்பூா் மாவட்டத்தைச் சோ்ந்த சாதிக், காஜியாபாதில் வசித்து வருவது தெரியவந்தது. இதையடுத்து, அவா் சிகிச்சைக்காக மருத்துவமனைக்குக் கொண்டு செல்லப்பட்டாா். விசாரணையில் சாதிக் மீது தில்லி, நொய்டா உள்ளிட்ட இடங்களில் பல்வேறு கொள்ளை வழக்குகள் பதிவாகி இருப்பதும் தெரியவந்தது. அவரிடமிருந்து நாட்டுத் துப்பாக்கி மீட்கப்பட்டது. மேலும், மோட்டாா் சைக்கிளும் பறிமுதல் செய்யப்பட்டதாக காவல் அதிகாரி அங்குா் அகா்வால் தெரிவித்தாா்.