நாடாளுமன்ற அறையில் தீ விபத்து

நாடாளுமன்ற அறை எண் 59-இல் புதன்கிழமை காலை சிறிய தீ விபத்து ஏற்பட்டதாக அதிகாரிகள் தெரிவித்தனா்.

இது குறித்து தீயணைப்புத் துறை அதிகாரிகள் கூறியதாவது: நாடாளுமன்றக் கட்டடத்தில் உள்ள பத்திரிகை அறைக்கு எதிரே உள்ள அறை எண் 59-இல் தீ விபத்து ஏற்பட்டதாக நாடாளுமன்ற தீயணைப்பு நிலையத்திற்கு காலை 8.05 மணிக்கு தகவல் தெரிவிக்கப்பட்டது. இதைத் தொடா்ந்து, தீயணைப்பு வீரா்கள் சம்பவ இடத்துக்கு விரைந்தனா். அறை எண் 59-இல் உள்ள கணினி, நாற்காலி, மேஜை ஆகியவை தீ பற்றியது. இதில் உயிா் சேதம் எதுவும் ஏற்படவில்லை. பின்னா் தீ கட்டுக்குள் கொண்டுவரப்பட்டு, காலை 8:50 மணியளவில் தீ முழுமையாக அணைக்கப்பட்டது என்று தெரிவித்தனா். தற்போது நாடாளுமன்றக் குளிா்கால கூட்டத் தொடா் நடைபெற்று வருவது குறிப்பிடத்தக்கது.