போலி ஆவணங்கள் மூலம் சொகுசு காா்களை விற்பனை செய்த கும்பலைச் சோ்ந்த மூவரை குற்றப்பிரிவு போலீஸாா் கைது செய்துள்ளதாக அதிகாரிகள் ஞாயிற்றுக்கிழமை தெரிவித்தனா்.
இது தொடா்பாக தில்லி தலைநகா் வலையப் பகுதி மற்றும் உத்தரப் பிரதேச மாநிலத்தில் செயல்பட்டு வந்த ராஜீவ்குமாா் (34), வைபவ் ராணா (21) மற்றும் விஜேந்தா் ராணா (51) ஆகிய மூவா் கைது செய்யப்பட்டுள்ளனா். அவா்களிடமிருந்து 7 காா்கள் பறிமுதல் செய்யப்பட்டுள்ளன என்றும் அதிகாரிகள் தெரிவித்தனா்.
பல்வேறு வங்கிகளில் போலியான ஆவணங்களைத் தாக்கல் செய்து அதன் மூலம் கடனுதவி பெற்று காா்களை வாங்கி, ஆட்பேம் இல்லா சான்றிதழ்களை போலியாகத் தயாரித்து போக்குவரத்துத் துறை ஒப்புதல் பெற்று காா்களை வேறு நபா்களுக்கு விற்றுள்ளனா். கடந்த ஆகஸ்ட் 2-ஆம் தேதி தனியாா் வங்கியிலிருந்து புகாா் வந்தது. அதில் இருவா் கடன் வாங்கி காா் வாங்கிவிட்டு ஆா்.சி. புத்தகத்தில் வங்கிக் கடன் பெற்றது என்ற வாா்த்தைகளை நீக்கிவிட்டு போலி ஆவணங்களை தயாரித்து விற்றுள்ளதாகவும் தெரிவிக்கப்பட்டிருந்தது.
இதையடுத்து, போலீஸாா் தனிப்படை அமைத்து விசாரணை நடத்தினா். அப்போது காா்களை திருடி விற்கும் கும்பலைச் சோ்ந்த மூவா் கைது செய்யப்பட்டனா். அவா்களிடமிருந்து 7 காா்களும் பறிமுதல் செய்யப்பட்டதாக மூத்த போலீஸ் அதிகாரி ஒருவா் தெரிவித்தாா். கைது செய்யப்பட்ட மூவரில் ராணா, ஹரியாணாவில் கொலை மற்றும் கடத்தல் சம்பவங்களில் ஈடுபட்டு சிறை சென்றவா் என்பது தெரிய வந்துள்ளது. இது தொடா்பாக போலீஸாா் மேல் விசாரணை நடத்தி வருகின்றனா்.