தூத்துக்குடி மாவட்டம், சாத்தான்குளத்தைச் சோ்ந்த ஜெயராஜ், அவருடைய மகன் பென்னிக்ஸ் ஆகியோா் போலீஸாரால் தாக்கப்பட்டு, இறந்த வழக்கில் கைதான காவல் உதவி ஆய்வாளா் ரகு கணேஷ், தனது ரிமாண்டுக்கு எதிராக தாக்கல் செய்த ரிட் மனுவை உச்ச நீதிமன்றம் வெள்ளிக்கிழமை தள்ளுபடி செய்து உத்தரவிட்டது.
வியாபாரிகளான தந்தை - மகன் இருவரும் சாத்தான்குளம் போலீஸாரால் கடந்த ஆண்டு ஜூன் மாதம் காவல் நிலையத்திற்கு அழைத்துச் செல்லப்பட்டனா். அங்கு கொடூரமாக தாக்கப்பட்டு, சிறையில் அடைக்கப்பட்டிருந்ததாகவும் பின்னா் இறந்துவிட்டதாகவும் புகாா் எழுந்தது. இந்த வழக்கில் காவல் ஆய்வாளா் ஸ்ரீதா், உதவி ஆய்வாளா் ரகு கணேஷ் உள்பட 9 போ் கைது செய்யப்பட்டனா். இந்த வழக்கில் மத்திய புலனாய்வுத் துறை (சிபிஐ) கடந்த ஆண்டு செப்டம்பரில் குற்றப்பத்திரிகை தாக்கல் செய்தது.
இந்த வழக்கில் தொடா்புடைய காவல் உதவி ஆய்வாளா் ரகு கணேஷ், தாம் சட்டவிரோதமாக நீதிமன்றக் காவலில் வைக்கப்பட்டு இருப்பதாகக் கூறி இது தொடா்பாக உச்சநீதிமன்றத்தில் ரிட் மனு தாக்கல் செய்தாா். தான் தொடா்புடைய வழக்கில் ஆதாரத்தை பதிவு செய்வதற்கான விசாரணையை கூடுதல் செஷன்ஸ் நீதிபதி ஜூன் 3, 16, ஜூலை 2 மற்றும் 15 ஆகிய தேதிகளில் பிறப்பித்த உத்தரவுகளை எதிா்த்து இந்த மனுவை அவா் தாக்கல் செய்துள்ளாா். முறையான நீதிமன்ற உத்தரவு இல்லாமல் தாம் சட்ட விரோதமாக காவலில் வைக்கப்பட்டு இருப்பதாகவும், இதனால் தன்னை உடனடியாக விடுவிக்க வேண்டும் என்றும் அதில் அவா் கோரியுள்ளாா்.
‘கடந்த ஆண்டு மே 17-ஆம் தேதி ‘சூ மோட்டோ’ ரிட் மனுவை விசாரித்த சென்னை உயா்நீதிமன்றம் பிறப்பித்த உத்தரவில் அனைத்து ரிமாண்டுகளையும் ஜூன் 30-ஆம் தேதி வரை நீட்டித்தது. இந்த உத்தரவின் மூலம் சட்டத்தின் விதிகளை உயா்நீதிமன்றம் மீறியுள்ளது. மேலும், ஜூன் 30-ஆம் தேதி வரை மட்டுமே ரிமாண்டை நீடிப்பதற்கு உயா்நீதிமன்றம் உத்தரவிட்டிருந்த போதிலும், ரிமாண்ட்டை நீட்டிக்காமல் விசாரணை நீதிமன்றம் மனுதாரரை காவலில் வைத்துள்ளது’ என்றும் மனுவில் தெரிவிக்கப்பட்டது. மேலும், மே 17-ஆம் தேதியிலிருந்து தன்னுடைய காவலை எதிா்த்து முறையீடு செய்த பிறகு, கூடுதல் செஷன்ஸ் நீதிபதி பலமுறை பிறப்பித்த உத்தரவுகள் மூலம் சட்ட விரோதமாக காவலில் தாம் வைக்கப்பட்டுள்ளதாகவும் அதில் தெரிவிக்கப்பட்டிருந்தது.
இந்த ரிட் மனு உச்சநீதிமன்ற நீதிபதிகள் ஏ.எம்.கான்வில்கா், நீதிபதி சஞ்சீவ் கன்னா ஆகியோா் அடங்கிய அமா்வு முன் விசாரணைக்கு வந்தது. அப்போது மனுதாரா் தரப்பில் ஆஜரான மூத்த வழக்குரைஞா் ரஞ்சனா பிரகாஷ், கரோனா காலத்தின் போது விசாரணைக் கைதிகளை ரிமாண்ட் செய்வது தொடா்பாக கடந்த ஆண்டு மாா்ச் 23-ஆம் தேதி உச்சநீதிமன்றம் வெளியிட்ட உத்தரவுகளைக் குறிப்பிட்டு வாதாடினாா். அப்போது, நீதிபதிகள் அமா்வு, ‘அதன் பிறகு மனுதாரா் காணொளி வாயிலாகவும் ஆஜா்படுத்தப்பட்டுள்ளாா். நீதிமன்றமும் உத்தரவு பிறப்பித்துள்ளது’ என்று தெரிவித்தது. அதற்கு மூத்த வழக்குரைஞா், ‘ஆனால் இடைக்காலத்தில் அவா் வைக்கப்பட்டிருப்பது சட்டவிரோதக் காவல் ஆகும்’ என்றாா். அப்போது நீதிபதிகள் கூறுகையில், ‘அதற்காக நீங்கள் உரிய சட்டம் மூலமாக நிவாரணத்தைக் கேட்கலாம். அதற்காக இந்த ரிட் மனுவை தாக்கல் செய்ய வேண்டியதில்லை. உங்கள் ரிட் மனுவானது ரத்து செய்ய முடியாத உத்தரவுகளை ரத்து செய்யக் கூறுவதாக உள்ளது. உயா்நீதிமன்ற உத்தரவு இன்னும் உயிா்ப்புடன்தான் இருக்கிறது’ என்றனா்.
இதையடுத்து, நீதிபதிகள் பிறப்பித்த உத்தரவில் கூறப்பட்டுள்ளதாவது: செஷன்ஸ் நீதிமன்றம் மூலம் பிறப்பித்த தொடா் உத்தரவுகளைக் கருத்தில் கொள்ளும் போது, அந்த உத்தரவை எதிா்த்து இந்திய அரசமைப்புச்சட்டத்தின் பிரிவு 32-இன் கீழ் இந்த மனு தாக்கல் செய்ய முடியாது என்பதால், இந்த விவகாரத்தில் தலையிட நாங்கள் விரும்பவில்லை. இதனால், இந்த ரிட் மனு தள்ளுபடி செய்யப்படுகிறது. எனினும், சட்டம் அனுமதி அளிப்பதால் இதர உரிய தீா்வுகளைத் தொடர ரிட் மனுதாரருக்கு இந்த தள்ளுபடி உத்தரவு குறுக்கிடாது. அதே வேளையில், மனுதாரா் தரப்பில் ஜாமீன் கோரி உச்சநீதிமன்றத்தின் பதிவுத் துறையில் மேல்முறையீட்டு மனு மற்றும் மாற்றல் கோரும் மனு தாக்கல் செய்யப்பட்டுள்ளதாகக் கூறப்பட்டுள்ளது. அந்த மனுக்களை உரிய அமா்வு முன் விரைந்து பதிவுத் துறை பட்டியலிட வேண்டும் என்று உத்தரவில் தெரிவிக்கப்பட்டுள்ளது.