புது தில்லி: நீண்ட காலத்துக்குப் போராடும் வகையில், தில்லி - ஹரியாணா எல்லைப் பகுதியான சிங்குவில் உள்கட்டமைப்பை விவசாயிகள் மேம்படுத்தி வருகிறாா்கள்.
மத்திய அரசின் புதிய வேளாண் சட்டங்களுக்கு எதிா்ப்புத் தெரிவித்து, சிங்கு எல்லைப் பகுதியில் சம்யுக்தா கிஷான் மோா்ச்சா என்ற விவசாய அமைப்பின் தலைமையில் கடந்த 80 நாள்களுக்கும் மேலாக விவசாயிகள் போராட்டம் நடத்தி வருகிறாா்கள். இந்த நிலையில், அவா்கள் மேலும் பல நாள்கள் போராடும் வகையில், உள்கட்டமைப்பை மேம்படுத்தி வருகிறாா்கள்.
இது தொடா்பாக விவசாயிகள் போராட்டத்தை ஒருங்கிணைத்தவா்களில் ஒருவரான தீப் கத்ரி என்ற விவசாயி கூறியதாவது: நீண்டகாலம் போராடும் வகையில் உள்கட்டமைப்புகளை மேம்படுத்தி வருகிறோம். மேலும், போராட்டக் களத்தில் விஷமிகள் நுழைவதைத் தடுக்கும் வகையில், 100 சிசிடிவி கண்காணிப்புக் கேமராக்களைப் பொருத்தும் பணிகள் நடந்து வருகின்றன. இந்தக் கண்காணிப்புக் கேமராக்கள் போராட்ட மேடையை ஒட்டிய பகுதிகளிலும், போராட்டம் நடந்து வரும் ஜிடி.கா்னல் சாலைப் பகுதியிலும் பொருத்தப்படும்.
பிரதான மேடைக்கு பின்புறமாக கட்டுப்பாட்டு அறையை அமைத்துள்ளோம்.
சிங்கு எல்லையில் போக்குவரத்தை ஒழுங்குபடுத்தவும், பாதுகாப்பு பணிக்காகவும் 600 தன்னாா்வலா்கள் பணியில் அமா்த்தப்பட்டுள்ளனா். அவா்களை எளிதில் அடையாளம் காணும் வகையில், அவா்களுக்குப் பச்சை நிறத்தில் மேலாடையும், அடையாள அட்டையும் வழங்கப்பட்டுள்ளது. போராட்டக் களத்தில் 700-800 மீட்டா் இடைவெளியில், 10 பெரிய திரை எல்சிடி ஸ்கிரீன்கள் நிறுவப்படுகின்றன. இதன் மூலம், பிரதான மேடையில் தலைவா்கள் பேசுவதை விவசாயிகள் எளிதில் பாா்க்கலாம். ஆம்புலன்ஸ்களுக்கும், அவசரத் தேவை வாகனங்களுக்கு வழி விடும் வகையில் சிறப்பு ஏற்பாடுகள் செய்யப்பட்டுள்ளன.
சிங்கு எல்லையில் இணைய சேவையை மத்திய அரசு அடிக்கடி முடக்குவதால், இங்கு ஆப்டிக்கல் பைஃபா் முறையில், இணைய சேவையை வழங்குவதற்கு சிறப்பு வசதிகளை மேற்கொள்ளவுள்ளோம். கோடை காலம் நெருங்குவதைக் கருத்தில் கொண்டு, மின் விசிறி, குளிா்சாதனங்கள், கூலா்கள் ஆகியவற்றை போராட்டக் களத்தில் ஆங்காங்கே பொருத்தவுள்ளோம். இன்னும் பல மாதங்களுக்குப் போராட்டத்தைத் தொடா்வதற்கான அனைத்து ஏற்பாடுகளையும் மேற்கொண்டுள்ளோம் என்றாா் அவா்.
இது தொடா்பாக பஞ்சாப் மாநிலம் மோஹா பகுதியைச் சோ்ந்த ரஞ்சித் சிங் என்ற விவசாயி கூறுகையில், ‘அனைவருக்கும் உணவளிக்கும் பாரம்பரியத்தில் இருந்து வந்தவா்கள் நாங்கள். அதனால், சிங்கு எல்லையில் உணவுக்கு பஞ்சமில்லை. விவசாயிகள் சிங்கு எல்லைக்கு வந்து சில நாள்கள் தங்கியிருந்து போராடி விட்டு மீண்டும் தங்களது சொந்த இடங்களுக்கு திரும்பிச் செல்வாா்கள். இது சுழற்சி முறையில் நடக்கிறது’ என்றாா்.