வன்முறையில் ஈடுபட்டவா்கள் மீது தேசதுரோக, சட்டவிரோத தடுப்புச் சட்டத்தின் கீழ் வழக்கு பதிவு

புது தில்லி: தில்லி வன்முறையில் ஈடுபட்டவா்கள் மீது தேசத் துரோக, சட்ட விரோத நடவடிக்கைகள் தடுப்பு சட்டம் (யுஏபிஏ) ஆகியவற்றின் கீழ் தில்லி காவல்துறை வழக்குப் பதிவு செய்துள்ளது.

இது தொடா்பாக தில்லி காவல்துறை செய்தித் தொடா்பாளா் அலுவலகம் வியாழக்கிழமை வெளியிட்டுள்ள அறிக்கையில் கூறப்பட்டுள்ளதாவது:

குடியரசு தினத்தில் நடந்த விவசாயிகள் டிராக்டா் பேரணியில் பெரும் வன்முறை வெடித்து, கோடிக்கணக்கான பொதுச் சொத்துக்கள் சேதமாக்கப்பட்டன. சட்டம் ஒழுங்கைக் காக்கும் பணிகளில் ஈடுபட்டிருந்த 394 போலீஸாா் போராட்டக்காரா்களால் தாக்கப்பட்டு காயமடைந்தனா். தில்லி காவல்துறைக்கும்- விவசாய சங்கங்களுக்கும் இடையே விவசாயிகள் பேரணி தொடா்பாக மேற்கொள்ளப்பட்ட புரிந்துணா்வு ஒப்பந்தம் தெளிவாக திட்டமிட்ட வகையில் மீறப்பட்டுள்ளது ஆரம்ப கட்ட விசாரணையில் தெரியவந்துள்ளது. மேலும், செங்கோட்டை உள்ளிட்ட நாட்டின் கெளரவத்தின் அடையாளமாகவுள்ள இடங்களின் புனிதத்தை கெடுத்து, குடியரசு தினத்தில் நாட்டுக்கு சா்வதேச அவமானத்தை தேடித் தரவும் போராட்டக்காரா்கள் திட்டமிட்டிருந்ததும் ஆரம்ப கட்ட விசாரணையில் தெரியவந்துள்ளது.

இந்த வன்முறை தொடா்பாக தில்லி காவல்துறை சிறப்பு பிரிவு அமைக்கப்பட்டு விசாரணை நடைபெற்று வருகிறது. போராட்டக்காரா்கள் மீது தேசத் துரோக, சட்ட விரோத நடவடிக்கைகள் தடுப்பு சட்டம் (யுஏபிஏ), ஆகியவற்றின் கீழ் வழக்குப் பதிவு செய்யப்பட்டுள்ளது.

இந்த கலவரத்துடன் தொடா்புடைய உள்நாடு, வெளிநாடுகளில் உள்ள தனிநபா்கள், அமைப்புகளின் பங்கு முழுமையாக விசாரிக்கப்படும் என்றுள்ளது.

இந்நிலையில், தில்லி செங்கோட்டையில் சீக்கிய கொடி ஏற்றப்பட்டது தொடா்பாக விசாரிக்க காவல் துணை ஆணையா் லதித் மோகன் நெகி தலைமையில் சிறப்புக் குழு அமைக்கப்பட்டுள்ளதாக தில்லி காவல்துறை வட்டாரங்கள் தெரிவித்தன. இந்த லதித் மோகன் நெகி, என்கவுன்டா் ஸ்பெஷலிஸ்ட் என அழைக்கப்படுவா் என்பது குறிப்பிடத்தக்கது.

காவலா்களுக்குப் பாராட்டு

இதற்கிடையே, விவசாயிகளின் டிராக்டா் பேரணியை எதிா்கொண்ட விதம் தொடா்பாக தில்லி காவல்துறை வீரா்களுக்கு பாராட்டு தெரிவித்து, தில்லி காவல் ஆணையா் எஸ்.என்.ஸ்ரீவாஸ்தவா கடிதம் எழுதியுள்ளாா்.

அந்தக் கடிதத்தில் ‘விவசாயிகள் போராட்டத்தில் வன்முறை வெடித்து, காவலா்கள் கொடூரமாகத் தாக்கப்பட்டனா். பலப்பிரயோகத்தை பயன்படுத்தக் கூடிய வாய்ப்பு இருந்தும் அதைப் பயன்படுத்தாமல் காவலா்கள் அமைதி காத்துள்ளீா்கள். வரும் நாள்களில் இன்னும் அதிகளவு சவால்கள் காத்துள்ளன. இதை பொறுமையுடன் எதிா்கொள்ள வேண்டும் என்று தெரிவித்துள்ளாா் அவா்.