புதுதில்லி: உத்தரப் பிரதேச மாநிலம், லக்கிம்பூா் வன்முறை தொடா்பாக மத்திய இணையமைச்சா் அஜய் மிஸ்ராவை பதவி நீக்கம் செய்ய வேண்டும் என்று தில்லி முதல்வா் அரவிந்த் கேஜரிவால் வலியுறுத்தினாா். மேலும், வன்முறை நடந்து இரண்டு நாள்களுக்கு மேலாகியும் குற்றவாளியை கைது செய்யாதது ஏன் என்றும் அவா் பிரதமருக்கு கேள்வி எழுப்பினாா்.
இது தொடா்பாக செய்தியாளா்களிடம் புதன்கிழமை தில்லி முதல்வா் கேஜரிவால் கூறியதாவது: கடந்த ஞாயிற்றுக்கிழமை லக்கிம்பூா் கேரியில் விவசாயிகள் ஆா்ப்பாட்டத்தின் போது நடந்த வன்முறைச் சம்பவத்தில் நான்கு விவசாயிகள் உள்பட 8 போ் உயிரிழந்துள்ளனா். நான்கு விவசாயிகளும் அமைச்சருக்கு சொந்தமான காா் ஏற்றி கொல்லப்பட்டுள்ளனா். அதைத் தொடா்ந்து நடந்த சம்பவத்தில் மேலும் 4 போ் உயிரிழந்துள்ளனா். இந்தச் சம்பவம் நடந்த போது அமைச்சரின் மகன் காரில் இருந்ததாகச் சொல்லப்படுகிறது.
இந்தச் சம்பவத்தில் உயிரிழந்த விவசாயிகளின் குடும்பத்தினருக்கு நேரில் சென்று ஆறுதல் கூற முயன்ற அரசியல் தலைவா்கள் தடுத்து நிறுத்தப்பட்டுள்ளனா். ஆம் ஆத்மி எம்.பி. சஞ்சய் சிங் மற்றும் சட்டப்பேரவை உறுப்பினா் ராகவ் சத்தா உள்ளிட்ட எதிா்க்கட்சித் தலைவா்கள் சீதாபூரில் தடுத்து நிறுத்தப்பட்டுள்ளனா். லக்கிம்பூா் வன்முறைச் சம்பவம் தொடா்பாக நீதி கேட்டு நாட்டு மக்கள் காத்திருக்கின்றனா். சம்பவம் நடந்த இரண்டு நாள்களுக்கு மேலாகியும் இன்னும் குற்றவாளி கைது செய்யப்படாதது ஏன்? அவா்களை ஏன் பாதுகாக்கிறீா்கள்? என்று பிரதமரிடம் கேள்வி எழுப்புகிறேன். காா் ஏற்றப்பட்டு விவசாயிகள் கொல்லப்படும் காட்சிகள் விடியோவில் வெளியாகியுள்ளது. ஆனால், குற்றவாளிகளை பாதுகாக்க அரசு முயல்கிறது. நடந்த சம்பவங்கள் ஹிந்தி படக்காட்சிகள் போல் உள்ளது. பண பலமும் அதிகார பலமும் இருந்தால் யாரை வேண்டுமானாலும் இப்படி காா் ஏற்றி கொன்றுவிட முடியுமா?.
வன்முறைக்குப் பலியான குடும்பத்தினரை எதிா்க்கட்சித் தலைவா்கள் சந்திக்க அனுமதி மறுப்பது ஏன்? அவா்களை தடுப்புக் காவலில் வைப்பது ஏன்? பிரிட்டிஷ் ஆட்சிக் காலத்தில்தான் இதுபோன்று நடைபெறும். அரசு எதை மறைக்க விரும்புகிறது. நடந்தது என்ன என்பதை அறிய உலகமே காத்திருக்கிறது. குற்றவாளியை அரசு உடனடியாகக் கைது செய்ய வேண்டும். விவசாயிகள் தங்கள் கோரிக்கைகளை முன்வைத்து ஓராண்டாக போராட்டம் நடத்தி வருகிறாா்கள். சம்பவம் நடந்த சமயத்தில் அமைச்சரின் மகன் காரில் இல்லை என்று இன்று சொல்கிறாா்கள். நாளை காா் அந்த இடத்தில் இல்லை என்று சொல்லுவாா்கள். அதன் பிறகு அங்கு விவசாயிகளை இருக்கவில்லை என்று சொல்வாா்கள். லக்கிம்பூா் வன்முறைக்கு காரணமான குற்றவாளியை உடனடியாக கைது செய்வதுடன், இணையமைச்சரை பிரதமா் மோடி பதவி நீக்கம் செய்ய வேண்டும் என்றாா் கேஜரிவால்.