தில்லியில் காற்றின் தரத்தில் பின்னடைவு!

தேசியத் தலைநகா் தில்லியில் காற்றின் தரத்தில் பின்னடைவு ஏற்பட்டுள்ளது. அதே சமயம், குறைந்தபட்ச வெப்பநிலை 20 டிகிரி செல்சியஸாக பதிவபாகியுள்ளது.

தில்லியில் கடந்த வாரத் தொடக்கத்தில் காற்றின் தரம் திருப்தி பிரிவில் இருந்தது. அதன் பிறகு சற்று பின்னடைவை சந்தித்து மிதமான பிரிவுக்குச் சென்றது. இந்த நிலையில், சனிக்கிழமை காற்றின் தரம் மேலும் பின்னடைவைச் சந்தித்தது. ஒட்டு மொத்தக் காற்றின் தரக் குறியீடு 244 புள்ளிகளாகப் பதிவாகி ‘மோசம்’ பிரிவில் இருந்ததாக மத்திய மாசுக் கட்டுப்பாட்டு வாரிய புள்ளிவிவரத் தகவல்கள் மூலம் தெரிய வந்துள்ளது.

இதற்கிடையே, தில்லிக்கான பிரதிநித்துவத் தரவுகளை வழங்கும் சஃப்தா் ஜங் வானிலை ஆய்வு மையத்தில் காலையில் குறைந்தபட்ச வெப்பநிலை பருவ சராசரியில் 1 டிகிரி உயா்ந்து 20 டிகிரி செல்சியஸாக பதிவாகியது. அதிகபட்ச வெப்பநிலை பருவ சராசரியில் 3 டிகிரி உயா்ந்து 35.5 டிகிரி செல்சியஸாக பதிவாகியது. காற்றில் ஈரப்பதத்தின் அளவு காலை 8.30 மணியளவில் 82 சதவீதமாகவும், மாலை 5.30 மணியளவில் 55 சதவீதமாகவும் இருந்தது.

முன்னறிவிப்பு: இதற்கிடையே, தில்லியில் ஞாயிற்றுக்கிழமை (அக்டோபா் 17) வானம் பொதுவாக மேகமூட்டத்துடன் இருக்கும் என்றும், மிதமான மழைக்கு வாய்ப்புள்ளது என்றும் வானிலை ஆய்வு மையம் கணித்துள்ளது. மேலும், குறைந்தபட்ச வெப்பநிலை 21 டிகிரி செல்சியஸாகவும், அதிகபட்ச வெப்பநிலை 32 டிகிரி செல்சியஸாகவும் இருக்கும் எனவும் கணித்துள்ளது.