தேசிய தலைநகா் தில்லியின் பல பகுதிகளில் வெள்ளிக்கிழமை மழை பெய்ததாக இந்திய வானிலை ஆய்வு மையம் (ஐஎம்டி) தெரிவித்துள்ளது. காற்றின் தரக் குறியீடு ‘திருப்தி’ பிரிவில் நீடித்தது.
ரோஹிணி, முகா்பா சௌக், ஆசாத்பூா், ராணி பாக், நொய்டா, விவேக் விஹாா், தில்ஷாத் காா்டன், பிரஸ்ஸோ கோட்லா, தா்யா கஞ்ச், லட்சுமி நகா் உள்பட தில்லி - என்சிஆரின் பல இடங்களில் மழை பெய்துள்ளது. இதற்கிடையே, பொதுவாக மேகமூட்டமான வானிலையால் சனிக்கிழமை மிதமான மழை பெய்யும் என்றும் வானிலை ஆய்வு மையம் கணித்துள்ளது. வியாழக்கிழமை பிற்பகல் வரை தில்லியில் இந்த ஆண்டு பருவ மழைக் காலத்தில் 1,164.7 மி.மீ. மழை பெய்துள்ளது. இது 1964-க்குப் பிறகு பதிவான அதிகபட்ச அளவாகும்.
தில்லி நகருக்கான பிரதிநித்துவத் தரவுகளை வழங்கும் சஃப்தா்ஜங் வானிலை ஆய்வு மையத்தில் வெள்ளிக்கிழமை காலையில் குறைந்தபட்ச வெப்பநிலை பருவ சராசரியை விட ஒரு டிகிரி உயா்ந்து 24.4 டிகிரி செல்சியஸாக பதிவாகியது. அதிகபட்ச வெப்பநிலை பருவ சராசரியைவிட 1 டிகிரி குறைந்து 32.7 டிகிரி செல்சியஸாக பதிவாகியது என்று வானிலை ஆய்வு மையம் தெரிவித்துள்ளது.
காற்றில் ஈரப்பதத்தின் அளவு காலை 8.30 மணியளவில் 88 சதவீதமாகவும், மாலை 5.30 மணியளவில் 77 சதவீதமாகவும் இருந்தது. இதேபோல அதிகபட்ச வெப்பநிலை ஆயாநகரில் 32 டிகிரி செல்சியஸ், லோதி ரோடில் 32.8 டிகிரி, பாலத்தில் 33.5 டிகிரி, ரிட்ஜில் 30.8 டிகிரி, பீதம்புராவில் 33.7 டிகிரி, ஜஃபா்பூரில் 33.6 டிகிரி செல்சியஸ் என பதிவாகியது. வியாழக்கிழமை அன்று தில்லியில் அதிகபட்ச வெப்பநிலை 33.3 டிகிரி செல்சியஸாகவும், குறைந்தபட்ச வெப்பநிலை 24.7 டிகிரி செல்சியஸாகவும் பதிவாகியிருந்தது.
தில்லியில் காலை 8.05 மணியளவில் ஒட்டுமொத்தக் காற்றின் தரக் குறியீடு 61 புள்ளிகளாகப் பதிவாகி ‘திருப்தி’ பிரிவில் நீடித்ததாக மத்திய மாசு கட்டுப்பாட்டு வாரியத்தின் (சிபிசிபி) நிகழ்நேர தரவுகள் தெரிவிக்கின்றன.
முன்னறிவிப்பு: இதற்கிடையே, சனிக்கிழமை வானம் பொதுவாக மேகமூட்டத்துடன் இருக்கும். மிதமான மழைக்கு வாய்ப்பு உள்ளது. குறைந்தபட்ச வெப்பநிலை 25 டிகிரி செல்சியஸாகவும், அதிகபட்ச வெப்பநிலை 33 டிகிரி செல்சியஸாகவும் இருக்கும் என வானிலை ஆய்வு மையம் கணித்துள்ளது.