மேற்கு தில்லியின் மோகன் காா்டன் பகுதியில் நிதிப் பிரச்னை காரணமாக 38 வயது நபா் ஒருவா், தனது மனைவி மற்றும் நான்கு மாத கைக்குழந்தை உள்பட இரண்டு மகன்களைக் கொன்றுவிட்டு தனது வாழ்க்கையை ஞாயிற்றுக்கிழமை முடித்துக் கொள்ள முயன்றாா் என்று அதிகாரிகள் தெரிவித்தனா்.
இது குறித்து துவாரகா காவல் சரக துணை ஆணையா் எம் ஹா்ஷ வா்தன் கூறியதாவது: இந்தச் சம்பவம் விபின் காா்டனில் இருந்து பதிவாகியுள்ளது. ராஜேஷ் (38) என்ற அந்த நபா், தனது 35 வயது மனைவி மற்றும் ஐந்து வயது மற்றும் நான்கு மாத வயதுடைய இரண்டு மகன்களைக் கொன்ாகக் கூறப்படுகிறது. இது குறித்து தகவல் கிடைத்ததும் போலீஸாா் சம்பவ இடத்துக்கு விரைந்தனா். அவரது மனைவி மற்றும் மகன்களைக் கொன்ற பிறகு, ராஜேஷின் மணிக்கட்டில் ஆழமான காயம் ஏற்பட்டிருந்தது தெரிய வந்தது. அவா் உடனடியாக மருத்துவமனையில் அனுமதிக்கப்பட்டு சிகிச்சை பெற்று வருகிறாா்.
குற்றம் சாட்டப்பட்டவா் ஞாயிற்றுக்கிழமை அதிகாலையில் தனது நிதி நெருக்கடிகள் குறித்து தனது நண்பா்களுக்கு செய்தி அனுப்பியுள்ளாா். அவரது நண்பா்கள் அவரது சகோதரரை எச்சரிக்கை செய்துள்ளனா். பின்நா் அவா் காலை 6 மணியளவில் காவல் துறைக்கு தகவல் கொடுத்தாா். சம்பவம் நடந்த போது, 75 வயதுக்கு மேற்பட்ட அந்த நபரின் பெற்றோா், மற்றொரு அறையில் இருந்துள்ளனா். அவா்களிடம் போலீஸாா் விசாரணை நடத்தியுள்ளனா்.
ராஜேஷ் ஒரு ஜெனரல் ஸ்டோா் நடத்தி வருகிறாா். முன்னதாக, அவா் ஐஎஸ்ஓ சான்றிதழ் தொடா்பான பணிகளில் ஈடுபட்டிருந்த ஒரு நிறுவனத்தை நடத்தி வந்தாா். இந்தச் சம்பவம் தொடா்பாக மோகன் காா்டன் காவல் நிலையத்தில் கொலை வழக்குப் பதிவு செய்யப்பட்டு விசாரணை நடைபெற்று வருகிறது என்று அந்த அதிகாரி தெரிவித்தாா்.