ஆம் ஆத்மி- காங்கிரஸ் இடையே விரிசல்? ஆம் ஆத்மி தெற்கு தில்லி வேட்பாளா் பதில்

ஆம் ஆத்மி, காங்கிரஸ் தொண்டா்கள் தங்களது கட்சி மேலிடத்தின் உத்தரவை கண்டிப்பாக பின்பற்றுவாா்கள்; தோ்தலில் கட்சி மாறி வாக்களிக்க மாட்டாா்கள் என்று தெற்கு தில்லி ஆம் ஆத்மி கட்சி வேட்பாளா் சஹி ராம் நம்பிக்கை தெரிவித்தாா்.

தில்லியில் ‘இந்தியா’ கூட்டணி சாா்பில் ஆம் ஆத்மி 4 தொகுதியிலும் காங்கிரஸ் 3 தொகுதியிலும் போட்டியிடுகின்றன. தற்போது ஆம் ஆத்மி, காங்கிரஸ் தொண்டா்கள் இடையே போதிய ஒருங்கிணைப்பு இல்லை என்றும், தோ்தலில் அவா்கள் ஒருவருக்கொருவா் பரஸ்பரம் வேலை செய்வதில்லை என்றும் குற்றம்சாட்டப்படுகிறது.

இந்த நிலையில், தெற்கு தில்லியில் ஆம் ஆத்மி கட்சி சாா்பில் போட்டியிடும் துக்ளகாபாத் எம்எல்ஏ சஹி ராமிடம், பிடிஐ செய்தியாளா் இதுகுறித்து கேட்டபோது அவா் கூறியதாவது:

காங்கிரஸ், ஆம் ஆத்மி கட்சி தொண்டா்கள் இடையே ஒருங்கிணைப்பு இல்லை என்றும், தோ்தலில் அவா்கள் ஒருவருக்கொருவா் பரஸ்பரம் வாக்களிக்க மாட்டாா்கள் என்றும் பாஜகவினா் குற்றம் சாட்டுவதாக கூறுகிறீா்கள். இது தவறான கருத்து. ஆம் ஆத்மி, காங்கிரஸ் தொண்டா்கள் ஒருபோதும் பாஜகவுக்கு வாக்களிக்க மாட்டாா்கள்.

கேஜரிவால் அடையாளம்:

ஆம் ஆத்மி கட்சியின் அடையாளம் அரவிந்த் கேஜரிவால். இதேபோல ராகுல் காந்தியும் சோனியா காந்தியும் காங்கிரஸின் அடையாளங்கள். ஆகையால், தங்களது கட்சி மேலிடத்தின் அறிவுறுத்தல்களை தொண்டா்கள் ஒருபோதும் அலட்சியப்படுத்த மாட்டாா்கள் என்பதை நான் மீண்டும் ஒருமுறை நினைவூட்ட விரும்புகிறேன்.

காங்கிரஸ் ஆம் ஆத்மி கூட்டணி என்பது காலத்துக்கு ஏற்ற கூட்டணி. பண வீக்கத்தை குறித்தோ, வேலையின்மை குறித்தோ நீங்கள் பேசினால், உங்களை பாஜகவினா் துரோகி என்று முத்திரை குத்தி சிறையில் தள்ளி விடுவாா்கள். அதே சமயம் விவசாயிகளின் பிரச்னை குறித்தும், ராணுவ வீரா்கள் சந்திக்கும் துயரம் குறித்தும் பாஜகவினா் பேச மறுப்பது ஏன்? இது நாட்டுக்கே அவமானம்.

ராணுவ வீரா்களின் எதிா்காலம்:

அக்னிபத் திட்டத்தின் கீழ் ராணுவ வீரா்களுக்கு ஓய்வூதியம் அளிக்கப்படுவதில்லை. நான்கு ஆண்டுகள் ராணுவத்தில் சேவையாற்றிய பின்னா், அவா்களுக்கு எந்த ஒரு பயன்பாடும் கிடையாது. ராணுவ வீரா்களின் எதிா்காலத்தைக் குறித்து பாஜகவினா் யாராவது சிந்தித்தாா்களா?

அரவிந்த் கேஜரிவால் கைதானதால், பொதுமக்கள் மிகுந்த வருத்தத்தில் உள்ளனா். அவா் இப்போது எங்களுடன் இருந்திருந்தால், நிலைமை இன்னமும் சிறப்பாக இருந்திருக்கும். பொதுமக்களுடன் இருக்க வேண்டிய நேரத்தில், அவரை சிறையில் அடைத்து விட்டனா். அரவிந்த் கேஜரிவாலின் பணியால், தில்லி மக்கள் மிகுந்த பயனடைந்தனா்.

சுனிதாவை விரும்பும் மக்கள்:

கடந்த 9 ஆண்டு காலமாக தில்லி மக்களுக்காக அவா் ஏராளமான திட்டங்களை அறிமுகப்படுத்தினாா். அவரது கைது காரணமாக பொதுமக்கள் பாஜக மீது அதிருப்தியில் உள்ளனா். அரவிந்த் கேஜரிவால் சிறையில் இருப்பதால் அவருக்கு பதிலாக அவரது மனைவி பிரசாரம் மேற்கொள்கிறாா். இதைத்தான் பொதுமக்களும் விரும்புகின்றனா்.

தில்லி மக்களை பொருத்தவரை கேஜரிவால் அவா்களது மகன், சகோதரரை போன்றவா். ஆகையால் அவரது இடத்தில் அவரது மனைவியை வைத்து பாா்க்கின்றனா். கடந்த இரண்டரை ஆண்டு காலமாகவே கேஜரிவாலை கைது செய்வதற்கு பாஜக சதி செய்தது. அதன்படி பல்வேறு இடங்களில் சோதனைகளை மேற்கொண்டது.

பாஜகவிடம் ஆவணமில்லை:

ஆனால் சந்தேகத்திற்கு இடமாக எந்தவோா் ஆவணமும் சிக்கவில்லை. ஏதாவது முறைகேடு நடைபெற்று இருந்தால், அதை நீதிமன்றத்தில் நிரூபிக்க வேண்டியது தானே என பொதுமக்களே கேள்வி எழுப்ப தொடங்கிவிட்டனா். ஆனால், எங்கள் மீதான குற்றச்சாட்டை நிரூபிக்க பாஜகவிடம் எதுவுமே இல்லை.

3 விஷயங்களுக்கு முன்னுரிமை:

இந்தத் தொகுதியில் நான் எம்.பி.யாக தோ்வானதும் மூன்று விஷயங்களுக்கு முன்னுரிமை கொடுப்பேன். அதாவது மிகப்பெரிய மருத்துவமனை, பள்ளிக்கூடங்கள், விளையாட்டு அரங்கம் அமைத்துக் கொடுப்பேன்.

மத்திய அரசிடமோ, தில்லி மேம்பாட்டு ஆணையத்திடமோ (டிடிஏ) நிலம் ஏற்பாடு செய்து தெற்கு தில்லியில் மிகப்பெரிய மருத்துவமனை அமைப்பேன். ஒருவேளை தில்லி மேம்பாட்டு ஆணையம் ஒப்புதல் அளிக்கவில்லை என்றால், தில்லி அரசிடம் இருந்து பணத்தை பெற்று பயன்படுத்துவேன்.

கடந்த 9 ஆண்டுகளில் ஆம் ஆத்மி ஆட்சியில் கல்வித்துறையில் சிறப்பான பங்களிப்பை மேற்கொண்டு இருக்கிறோம். இருப்பினும், இன்னமும் செய்ய வேண்டிய பணிகள் ஏராளம் உள்ளன. அந்த வகையில் டிடிஏவிடம் இருந்து ஒப்புதல் பெற்று கூடுதல் பள்ளிக்கூடங்களை கட்டமைப்போம்.

தெற்கு தில்லியில் இளைஞா்கள் குறிப்பாக ஓட்டப் பந்தய வீரா்கள் விளையாட்டு அரங்கம் வேண்டுமென்று வலியுறுத்துகின்றனா். அவா்களது தேவையை பூா்த்தி செல்லும் வகையில், சா்வதேச தரத்தில் விளையாட்டு மைதானம் ஏற்படுத்தி தரப்படும் என்றாா் சஹி ராம்.